星期一中午，召吃午飯，眾位老友報名踴躍。上到華商銀行公會，嘩，乜咁墟冚，插針不入，唔知點解呢個會所竟然爆到瀉，平時邊會咁旺場呀。問吓夥計，原來中國銀行職員包咗廳，用膳地方少咗，故此大家要坐得緊密啲，將就吓。
眾人口沫橫飛之際，唔記得邊位老友提起，五月二十六日《信報》有一篇署名孫思嘅文章，似乎甚有內幕，大家欲知董先生為何下台，不可不讀，讀完就會了解曾先生上台後，會點樣對付香港人。講到政治，食飯都冇乜味，一啲老友身為選委，最近俾人「全場壓逼」，覺得壓力好大，尤其是有人叫出一票不能少嘅口號，有頭有面嘅選委重會被人要求交多十幾二十張票㖭，好似股票上市做包銷團咁，你估奉旨有人聽晒話嘅咩。講講吓，忽見一位身材高大，西裝骨骨之人行入嚟，乃李國章局長是也，佢與新聞秘書阿May與一位先生坐在大堂中間，逼到好似搭枱咁款，真少有也。啲問責局長食飯，周時都去上海總會（貴賓房）、Nicolini、香港會、鏞記之類，好少嚟華商銀行公會與銀行界嘅中級職員逼埋一齊嘅噃，證明呢位李局長十分親民，認真冇架子。
飯後返到寫字樓，立即搵番五月二十六日《信報》孫思嘅文章，金睛火眼咁睇一次。呢位作者孫思用「導火索」呢個內地名詞而唔用本港作者慣用嘅「導火線」，好可能係內地人。佢話○三年七一大遊行係董先生中途離任嘅導火索，大錯誤係把「國家安全條例草案」修訂為冇牙老虎，迎合民主派，只聽中央講經濟支持香港，聽唔到中央嘅政治要求，自把自為容許劉兆佳（首席顧問）鼓吹民主派與中央「無先決條件溝通論」……睇完之後，大家可自由想像，新的特首會點樣矯正舊的特首嘅政治錯誤！