美式漫畫暴力美學，最近已經由電影《罪惡城》「黑白」分明咁俾我哋見識過！籌劃兩年嘅《Killer7》好似驚我哋唔夠喉，今個星期借勢推出；一樣美式漫畫風格、一樣Sell第一身射擊血腥暴力！不過最創新者，係玩轉「多重人格」，一個人可以有7個化身、7種截然不同的殺人能力，點止一般第一身射擊遊戲，齋識換槍咁簡單！
記者：梁瑋瑜
《Killer7》
PS2/GameCube
推出日期：6月9日
《Killer7》係今年E3被大力追捧的遊戲！籌劃推出經時2年，原本只係諗住推出GC版，到本周正式見街，原來PS2用家都有份！遊戲最惹人注目點子，可以話全美式漫畫風格；猶記得去年PC推出漫畫式槍Game《XIII》，引得一眾家用機迷口水直流，𠵱家畀大家望到啦！其實《Killer7》嘅幕後製作班底都好強，監督係《Biohazard》嘅製作人三上真司，再加上PS2《Machigan》遊戲總監須田剛一擔任製作人，遊戲畫面真係予人一種好強烈自我風格；全漫畫式人設及遊戲介面，再加誇張嘅着色同高反差視覺效果，同電影《罪惡城》嘅高反差拍攝方法有異曲同工之妙，有效做出一種末世紀暴力的感染力！
7重人格特殊能力作解謎
故事背景講述一個名為HeavenSmiles的反政府組織，經常策動自殺式炸彈製造社會混亂；主角HarmanSmith臨危受命，受僱於政府鏟除這個秘密組織；起初玩家見到Smith可能會嚇一跳，主角竟然是一個66歲兼殘廢的糟老頭，但原來佢竟然如《24個比利》一書描述般（美國真人真事，首個被發現有24重人格的人），內心裏有7種不同人格，而且更能化身成殺人實體！
呢7名無人性嘅嗜血殺手，分別叫做Garcian、Dan、Masked、Coyote、Kevin、Con同埋一個女性Kaede！老實講，7重人格的確令遊戲產生了無限嘅變數，因為7個Smith都各自擁有不同的能力及擅使嘅槍械，當中不得不提嘅係Coyote同Kevin，佢哋分別有「眼神移動物體」同「隱形」的能力，佢哋除咗可以用諸殺人外，遊戲內好多解謎成份，好多時都要考玩家腦筋，不斷轉換能力嚟破解，如果齋殺戮式遊戲，或軍備競賽式轉換槍械已令你煩厭，《Killer7》或者可以俾到你新刺激。
7面Smith大剖析
槍擊效果血花四濺
電影感十足，亦係《Killer7》成功要素；基本遊戲進行時，是以第三身視點，玩家睇得清楚之餘，更重要係有多角度視點，等玩遊戲嘅人好似睇緊電影咁！不過當進入作戰範圍時，佢又會自動切換至大家最慣用嘅第一身視點，好等你放槍準啲，咁UserFriendly，抵讚！另外，槍擊效果的震撼性，亦是不得不提，一般敵人中槍時，都可以用血花四濺嚟形容，如果打中要害地方，重有漫畫風格的「血線四射」效果！加上超真實的槍擊及環境音效，槍Game嚟講都算上品！
又要顧住開槍、又要轉換視點周圍行，大家可能會擔心到操作系統超麻煩！不過可以話畀大家知，隻Game基本全以「直線」進行，簡單「○」、「×」兩鍵已經可以控制向前向後行，大家重可以騰出左手操控Analog掣殺敵，簡單嘅簡化，換嚟打Game嘅方便，好多老牌槍Game公司都未做到呢！
爆機升級小秘技
畀小小貼士大家，遇到大佬嘅時候留意吓佢身上面黃色地方，呢個就係佢嘅弱點所在，瞄準呢個部份狂射自然更加容易殺死大佬！此外，用呢種方法殺死中大佬或終極大佬，重有吸「血清」作用，而玩家就是憑呢啲血清，幫7個「惡煞」升級提高作戰能力，所以見敵人「閃黃光」，千祈唔好放過佢呀！
CAPCOM（23661001）
(c)grasshoppermanufactureInc.2005,CAPCOMCO.,Ltd.2005ALLRIGHTRESERVED
