煲呔一人大選戰，漸入高潮，呢兩日閉門召見「選委」，宣召政綱！
煲呔唔係接受面試，亦唔係懇求「選委」投佢神聖一票，強政勵治，即日起執行，對唔住，而係以壽爺親手欽點嘅新特首兼英國爵士身份，神聖賜見「選委」，嚴正勒令班「選委」聽話埋位，並循例將自己嘅政綱腹稿，向「選委」作出口頭通知，以便「選委」作出審視及諗嘢表情表達五秒鐘，然後舉手通過。
中國以儒家思想立國，正如老董話頭：儒家治港，儒家講上下尊卑，現時唔係美國選總統，要七情上面，請求選舉團及民眾支持，亦唔係台灣選總統，連戰宋楚瑜等，雙手合十，或者兩腳跪低咁「拜票」！呢個係小圈子選舉，由壽爺全權監製、導演、編劇，兼安排場記、道具、燈光、茶水、演員及臨記全體，開工期間，當然有包伙食嘅豐富福利，不過唔係畀你食自助餐，而係指定嘅叉雞飯盒，加清水一杯，連咖啡或茶，都冇得揀！
所以識做嘅，就好知碇，蒙寵接受召見之後，要爭解纜上船，爭住記名提名，舉手擁護，好等自己個名有理冇理落咗本大簿報到先，令到爵士淨提名就已經成八百個，個個有名有姓，陣容鼎盛！
愈早爭提名 愈早有得攞
千祈唔好提名得一百零八人，日後「投票」，就算有八百人捧場，由於高達六百九十二人係唔肯曝光嘅老襯無名英雄，將來爵士論功行賞，各人分派有煲呔圖案嘅壽包各一個，明明啲獎品共有八百份，都要焗住畀晒響朵提名嘅一百零八名好漢，係咪？
但凡親曾愛國，喺現階段就千祈唔好謙虛，嗌得要夠大聲，排隊聽訓，要爭擔櫈及坐頭排，愈早爭提名，愈快有壽包攞，無謂事後俾中央壽爺懷疑，提名又唔見你個衰名，係咪「棄權」以示抵制祖國？所以八百「選委」，可以選曾蔭權，又可以選曾霸權（因為民主派大罵「強政勵治」等同霸道），千祈唔好曾棄權，咁先至符合鄔庸所講嘅「道德水平」，知冇？
若然一路條氣唔順咁吟吟沉沉，一路焗住入場，俾壽爺見到兩片嘴唇不斷振動，判定係嘴形唔對路，雖然奉命舉咗手，但內心仍然噼噼啪啪咁，重一路打緊煲呔嘅小人，日後上人民大會堂，就冇你份喎！
爆料熱線：29290000、27860099
報料傳真：26239278
報料電郵：[email protected]