恒指最低嗰陣跌72點，埋單反升42點。中移動（941）居功至偉，由跌0.30元變升0.15元，拉高恒指9.4點，其次中海油（883）升兩格，帶動恒指上移6.5點。期指低水23點。大市氣氛似乎好番啲，但要有大作為，恐怕不易，可趁每次上升中，採低位買P輪策略。
恒指P輪4749：早段大市下跌時，恒指P輪4749見15.5仙，升5.4%，收市報14.3仙，反跌2.7%。隻輪10月尾夠鐘，溢價3.6%，槓桿率21.5倍（有效10.9倍），引伸波幅17.2%。最理想係恒指升多一升，升越13900，喺低位13仙邊邊買入4749。能夠低位上車嘅話，所能承受震盪嘅能力大啲。
恒指末日P輪3605，高位6.3仙，低位5仙，波幅26%，槓桿率超過50倍，炒呢隻要有思想準備，贏輸好快亦好大。溢價0.8%，代表110點恒指，愈近最後交易日（本月23日），揸呢隻輪心理壓力愈大，因為溢價會進一步收縮。
新地P輪4765：新地（016）升0.50元，但P輪4765冇跟正股作反方向移動。
最理想係新地進一步上升，例如升到挨近上周高位75.50元，低買4765。隻輪10月初到期，溢價4%，槓桿率27.5倍（有效11.9倍），引伸波幅12.8%，係喺適當時候新地最佳造淡對象。
章盛