早排熱錢流入炒人民幣升值，惠及股市，但人民幣升值亦對部份股份不利，當中以出口股為主，例如主要出口汽車零件的北泰創業（2339），股價在過去個幾月，由2元樓上跌落嚟，最低見過1.70元。
但北泰股價跌咗咁多，而人民幣重未升值，壞消息已預先反映。北泰將於6月15日公布全年業績，如無意外的話，應該會唔錯。證券分析員普遍預期北泰盈利有2.2億元，即係較去年升幾十個巴仙，家陣PE重係單位數字，所以預期業績會對股價有刺激。北泰昨日升0.54％，收1.86元。
另外，第一拖拉機（038）自從有一間美資農業機械商話想合作後，股價走勢非常掂，昨日升9.4％，收1.51元，成交股數2098萬股，金額3110萬元。雖然國家話重點發展農業，但一拖過往業績大家有目共睹，況且美資公司傾緊的合作，並不涉及入股，所以大家只宜跟風炒下，唔好有太大幻想。
慕容小初