容祖兒和謝霆鋒昨日在上海出席「英皇明星城」動土儀式時，獲安排與老闆楊受成一起坐在前排，不過穿拖鞋到場的霆鋒卻差點仆親，幸得王傑相扶才沒有出醜。
容祖兒、謝霆鋒、鄭希怡（Yumiko）、王傑、吳浩康、陸毅、瞿穎和楊受成等，昨日出席英皇集團有份投資、位於上海豫園的「英皇明星城」動土儀式。楊受成透露「明星城」將於○七年三月開幕，內有酒店及大型商場，總投資額為二十多億元。問楊受成可有信心比新天地搞得更熱鬧，他說：「各有各做啫。」
險仆倒出醜
容祖兒和謝霆鋒獲安排跟老闆楊受成一起坐在台上第一排，可見二人備受重視。其中霆鋒穿拖鞋到場，由於地面凹凸不平，故他上台時險些仆倒，幸好王傑及時扶住他，霆鋒說：「着拖鞋幾好呀，啲沙石入咗去都可以即時fing出嚟。」問霆鋒對於舊愛張栢芝的新碟大玩昔日緋聞，卻沒有他的份兒，他覺得幸運還是心酸？霆鋒說：「我唔答，冇理由喜慶日子講呢啲嘢嘅，而且好耐都冇答啦。」再問他會否幫襯王菲和李亞鵬在上海開設的酒吧？霆鋒說：「我唔知，亦唔答。」
容祖兒透露喜歡返內地揼骨，還自嘲骨精強，她說：「我一定會搵女仔揼，聽講啲男仔會趁你瞓着摸你㗎。」容祖兒表示覺得上海女孩子很漂亮，上海男仔則又白又醒目，問她可會找個上海男友，她說：「國籍唔係問題，適合就得。」
Yumiko創業
Yumiko則表示將在上海逗留一晚跟家人吃飯，她說：「我同阿爸會喺香港投資上海飯店，今日帶啲師傅出嚟試食，走嘅時候我會帶一打上海糭返香港，因為應承咗啲同事帶畀佢哋。」
採訪、攝影：曾小嘉
