下個月買咗飛睇曼聯訪港表演賽嘅波友，如無意外會率先睇到「紅魔」新兵表現，門將位置相信會係全新人選，因為費格遜已經搵荷蘭門將雲達沙過檔。
轉會費達200萬鎊
自從舒米高退休後，老費想搵番個水準穩定人選都搵咗好多年，泰比、保斯尼治、巴夫斯、侯活同卡路爾，試過晒之後依然無一個合心水；球季結束後全力搵門神，最後簽咗富咸嘅雲達沙。
費格遜簽雲達沙唔係奇事，因為幾年前已經睇中佢，上季中又重提舊事，到𠵱家最終成事。據聞轉會費二百萬鎊，但周薪成六萬鎊，以一個三十四歲嘅門神嚟講，出手認真闊綽。費格遜今次決定收購雲達沙，我求大俠認為「老費」係唔想再「隔山買牛」，但反應就遲咗（好似以前簽門將哥林同清道夫白蘭斯），亦可謂過份慳錢，先至搞到咁遲簽；好似前年夏天朗拿甸奴咁，如果肯畀多少少轉會費，早就簽咗呢位世界足球先生，唔通又要等多幾年，「細哨」踢到殘先搵人咩！
非洲勁旅接連失分
塞內加爾出線勢危
世界盃外圍賽戰線前晚就蔓延到非洲，不過兩支傳統勁旅就失分，尼日利亞臨完場先靠國米前鋒馬田斯入波，作客一比一迫和盧旺達；塞內加爾作客又俾剛果摸和○比○，𠵱家佢哋只排小組第二名，因為首名先可以出線決賽周，如果佢哋出唔到線，對球迷都係損失。
睇森巴波送賠率
靚女球彩台多選擇抵讚
前晚巴西對巴拉圭嘅世界盃外圍賽，唔止收費台嘅足球台有得睇，連主打賭波嘅球彩台都直播，單頭場次都有直播，都係球彩台新嘗試；其實好多波友都未必想聽「老正」旁述，反而更關心賠率變動、其他場次即時戰果等，重有靚女主持搞吓氣氛，收費台畀多啲選擇觀眾都係好事。
愛會慣做升降機
恩波里躉無晒癮
前日恩波里（以前譯安玻里）落實來季升番上意甲，而切爾達就會升番上西甲。查實好多聯賽都有降完即升嘅「升降機」，反映次級聯賽水平唔高，球迷亦乏新鮮感。好似恩波里前日對阿雷素場確定升班嘅主場波，竟然唔夠一萬人入場睇；似乎球迷對佢哋降完即升嘅風格司空見慣囉。