尖沙嘴凱旋門天際獨立屋，買家身份有新線索，據買賣合約備忘，買家SkyHouseLimited嘅唯一董事，乃係WilliamHuiChongHee。
威廉哥身份冚得好密，專登喺英屬處女島成立公司，等人哋想查都查唔到，蘭西暫時只係發現佢公司個聯絡地址，喺山頂道一百號，牛奶公司山頂商場A座地下一、二號舖，即係代理中原間舖。
份買賣合約基本條款都幾一般，買家揀建期付款，簽約時只畀半成，然後半成半成咁畀，八成尾數到出年交樓時先至找清。若然買家取消交易，發展商只保留半年期限追差價。
個單位除加送四個車位外，可售面積唔計露台、窗台同工作平台，室內近四千四呎，連千八呎有蓋露台，以及八百幾呎泳池過濾機房。
睇嚟，新地以呎價三萬幾，賣出凱旋門天際獨立屋嘅疑雲，因為缺乏新料而會暫告一段落。
卓百德等買商廈
活躍於商廈短炒嘅朱姓投資者或有關人士，上個月以一億零八百萬，賣出金鐘海富中心一座七○四D室，一個月賺咗百三萬，原來買家係𠵱家管理四千萬美金地產基金、摩根士丹利前顧問董事卓百德或有關人士。
公司註冊處資料顯示，買家係LAAREFHongKongOne,Ltd，卓百德係董事之一。
講開呢個朱姓投資者，上個月賣完海富之後，啱啱又再入番件貨，就係隔籬力寶中心第二座八○一室，一千九百呎，呎價八千，跟手放售，因有五個月成交期，叫價每呎一萬。
屋之島董事梁寶儀話，買家九六年以呎價九千九百購入自用，因計劃擴充至肯出售，諗住搵次級商廈，三千呎，呎價唔超過三千。
中銀標售金城中心
中銀一邊加按揭息，一邊沽貨，最新委託世邦魏理仕，標售長沙灣金城商業中心全幢，地盤五千五百八十呎，總樓面八萬五千呎，估值大約億八，平均約兩千一蚊呎，八月八號截標。
中銀準備售後租回地舖以及部份寫字樓，共六千八百呎，月租十六萬六，二○○七年交吉。
雖然面對加息，呢件貨都值得睇吓，事關地盤可以用九倍地積比率重建住宅，以估值億八計，樓面地價三千五，同信和舊年向中電買入件青山道三○五號，價錢差唔多，發展商重算有數為。
代理挖角七國咁亂
無論市旺市靜，代理都靠人海戰術霸市場佔有率，所以不停開分行及增人手。利記淨係九龍，分行就由年頭二十二間，擴充到𠵱家三十八間，噚日喺柯士甸道再添一間，重話陸續有嚟。
呢行幾時都需要人手，消息人士話，港置紅磡黃埔區三十個員工過檔利記，主打奧運站。
近排同樣積極擴充嘅港置，上周要咗北角與西半山嘅原誠信分行後，兩分行雙雙開單。集團即刻羅致以前中記南區尹慧雯（Alice）與前京士活鄭子偉（Raymond），坐鎮美孚及大道中分行。
電郵地址：[email protected]
