香港地像日本部屋的少，唔係因為單位大，而係始終唔夠膽玩另類，布置到全屋花喱花碌更為稀有。以下就係秉承「花喱碌就是美」的態度嘅真實「個案」，兩人搬出嚟住，膽量就Double上，將舊居花嘢移置到一個更花的場所，重有多次日本遊搜羅的七彩家品，襯落兩大幅醒目牆紙，至怕你唔眼花！
記者：梁彩燕
攝影：何家亮
設計公司：i-designFurnitureCo.（27688933）
女屋主Meilin坦言唔係特別鍾意着花衫、唔係工作沉悶找刺激，只是彈出一句「純粹鍾意囉！返到屋企會好開心，一啲都唔覺得眼花。」外人只得驚訝竟有人會如此激，布置屋企也夠晒盡，兩位當事人卻自得其樂，一切隨心。
而未置新居，阿耀和Meilin心目中已有個清晰藍圖，於是拎住兩本日本部屋雜誌，逛遍整條土瓜灣的設計公司，揀啱舖合眼緣夾口形就拍板訂家具，指定動作是照辦煮碗訂製兩個日式櫃放當眼處，勁Sharp又勁有部屋Feel。
自貼牆紙考功夫
入屋，抬頭望，飯廳一角最令眼睛震撼，一整幅橙底紅黃牆紙最是焦點，蜂巢櫃和紅櫃子則緊守兩邊崗位，與置中的一系列白餐桌椅極為合拍，單看此角落已成一幅甚耀眼奪目的畫面。多走兩步入睡房，亦是一大片圖案，微微帶黃的綠色牆紙，Pattern極罕見，十個見十個讚，至正係撞多幅同系綠牆，一床花喱碌公仔同紅花床鋪，真夠絕！但更絕的是牆紙都係由阿耀及外父親自貼，要對付圖案的交接位可真考功夫。
年半三遊日本購家品
全部都在無心插柳之下促成了好事，屋內甚多家品、擺設、布置甚至電器都係從日本買回來的，「那入門的透明膠桶圓櫈、飯廳吊燈、小枱燈、掛鐘、地氈、梳妝椅‥‥‥」兩人都在如數家珍般邊數邊說着，無他，皆因兩人響年半間去咗兩三次日本旅行，男女各自入貨；Meilin有心愛的HelloKitty精品或公仔，而阿耀更激，竟然連音響組合都搬埋返香港，「因為間屋唔算大，一路想搵套合心水的音響，去日本旅行時逛家品雜貨店，見到呢套Sony5.1，當時香港重未有得賣，最鍾意佢兩邊喇叭夠細長，唔會顯得間屋好逼狹。」
睇雜誌訂櫃
漏夜買音響
客廳放有42吋Plasma，側跟Sony5.1音響組合，體形纖瘦Cyber又型仔，原來當中亦有段古。
話說阿耀同Meilin遊北海道，夜麻麻重行緊DonQuijote家品雜貨店，一望見目標點會咁輕易放過！兩人唔係專業音響玩家，而且屋細所以音響都唔要大，於是即時扑槌點都要買，售價折番港幣約$5,000，船運費則$700，山長水又遠，都可算用心良苦！
隨行隨買
講真去日本邊買得咁多嘢！所以搬新居前都得靠周圍逛，Meilin自言只是「隨行隨買」，而且自己喜愛的類型萬變不離其宗，買買吓竟然將個房間襯出主題，但當然，都係花喱碌！
處處見Kitty
Meilin擁有極多公仔精品擺設裝飾，一眼看出又係HelloKitty迷。要擺放珍藏，除咗飯廳蜂巢櫃，層架、儲物櫃當然唔少得，同時床板、大型衣櫃亦有助提升儲物空間，共通點係顏色配合番房間的基調。
