大學校友雜誌 - 左丁山

大學校友雜誌 - 左丁山

食午飯時分,碰到賓架G,此君係年輕一代,入行不過十年,已成為獨當一面嘅衍生工具專家,講窩輪十份熟練,食正今日時興炒窩輪條水。香港之窩輪交易,增長迅速,每日成交額佔咗港交所總交易額二至三成,香港係世界最大嘅窩輪交易地方,你話投資也好,投機也好,香港啲基金、大戶與散戶嘅專業及冒險精神,全世界大大有名。

問賓架G:「你係唔係讀經濟、會計、財務出身㗎?」賓架G話:「完全唔係。我喺香港大學讀工業工程(IndustrialEngineering),完全同衍生工具無關。不過以前學習嘅系統性思考、程序鋪排與數學,現在大派用場。讀邊科,有乜關係吖。」咁啱嘅,當日左丁山喺上午碰到一位基金推廣專家,係年輕女士,又係十幾年前在港大主修工業工程。問賓架G識唔識得呢位校友,賓架G話:「畢業之後,同大學冇晒聯繫,點會識得啲高班師姐吖。話時話,我細佬喺中大畢業,佢每季都收到中大校友雜誌,睇得好過癮,我有時都攞嚟睇吓㗎,港大從來冇寄校友雜誌畀我睇!」
港大有冇校友雜誌,左丁山唔知,只知浸大都有出。校友雜誌,左丁山都算睇得多,唔知點解,曾收過南加州大學、耶魯大學、倫敦SOAS等名校嘅校友雜誌,USC嗰本做得最好,相片又靚,一睇就知道係有錢肯落本嘅製作,證明間學校有水有心機。SOAS嗰本簡單樸素低成本,而事實上SOAS好窮,可能冇乜資金搞好本校友雜誌。大學出版呢類刊物,目的好明顯啫,就係與畢業生維持聯繫,動之以情,希望校友肯每年自動捐款。如果有校友發咗大達,捐番一億美元畀大學,乜都返晒嚟啦。南加州大學收到咁多捐款,你估係偶然嘅咩。