鄭少秋同前妻沈殿霞嘅愛女鄭欣宜，日前啱啱先喺加拿大出席完中學畢業禮，同埋慶祝十八歲生日，踏入人生另一個新階段，點知噚日中午台灣中天新聞台就喺報道新聞時，打出「傳欣宜食減肥藥暴斃」嘅消息，馮仁昭證實呢單係「流料」。
身體狀況良好
秋官噚日對呢件事回應話：「最緊要個女冇事，傳呢啲嘢梗係唔好，嚇親老人家。」問秋官可覺因為欣宜知名度大增累事，秋官話：「可能係，我都會打畀欣宜，希望佢唔好唔開心。」
馮仁昭又打畀贊助欣宜纖體嘅修身堂老闆娘張玉珊，佢打咗去加拿大聯絡負責照顧欣宜嘅營養師，張玉珊話：「營養師每日都會同我報告欣宜嘅身體狀況，佢話欣宜凌晨兩點重喺屋企行來行去。」
對於失實報道，張玉珊好激氣咁話：「如果嗰啲報道影響到公司形象，我哋唔排除法律追究，公司個個月都同欣宜驗身，佢嘅健康狀況一個月比一個月好，我好嬲啲失實報道，佢哋唔求證就出街，唔好咁癲啦！」
而中天新聞台發言人就話：「我們最初的資料來源自一個內地的網上消息，後來向鄭少秋和沈殿霞求證過，他們都否認消息。」
黃秋生、周杰倫父子飯局
黃秋生近日去台灣宣傳電影《頭文字D》時，抽空同喺戲裏面扮仔嘅周杰倫同S.H.E嘅Ella去咗食飯，席間Ella拎相機出嚟話要同秋生合照，周杰倫就負責做攝影師，之後Ella立即擺出一副活潑樣同秋生合照，不過之後睇相時，Ella就大彈周杰倫影嘅相太黑唔夠光。
范瑋琪、張韶涵扮女同志
范瑋琪同張韶涵噚日喺台灣拍攝新歌《如果的事》MV，歌詞入面有暗示女同性戀嘅字句，都幾敏感吓。
范瑋琪同張韶涵喺MV入面有唔少擁抱嘅親暱鏡頭，不過佢哋就異口同聲話自己都係鍾意男生，但兩人就同樣試過俾女生追求咁話。
關之琳買定雜誌上機
關之琳前日一個人拎住價值萬幾蚊嘅LV牛仔布袋，佢玉手重戴住一隻黃鑽戒指，喺香港機場裏邊嘅書店出現，佢話買定雜誌上飛機睇。
之之話：「我前幾日才剛到台灣拜訪朋友，今次準備到杭州拍攝一個保養品廣告。」
