港股噚日不跌反升，基本上係顯示市底已一路轉強。
外圍股市不利，上周五美股下跌近百點，而本港銀行又提高樓宇按揭利率，消息利淡，但港股唔落得，恒指重以13860接近全日高位收市，升42點，成交133億元，期指低水23點，上升股隻（不計認股證）則比下跌股隻為多。
自從金管局推出優化聯繫滙率政策後，1個月到3個月的港元同業拆息最少為3.3厘，因此銀行確實有需要提升按揭息率，中銀香港（2388）由P-2.25厘至2.5厘，提高至P-2至2.25厘，並削減現金回贈，加息後，新造按揭利率實質為3.5厘至3.75厘。中銀之後，滙豐同恒生（011）亦調高按揭息率0.25厘至P-2厘，相信日內會有更多銀行跟隨，估計按息升勢持續，到年底時會去到4.25厘至4.5厘。
按息上升，對樓市有影響，但由於4厘的息率仍屬一個較低的水平，且係循序上升，因此預計唔會為樓市帶來太大的衝擊，筆者仍然看好地產股在今年下半年的表現，特別係新地（016），有機會升越76.50元，向80元的高位推進。
大市月底開車機會高
月中有幾隻大藍籌C輪到期，大戶為要食到盡，唔排除在未來一兩個禮拜重會㩒住個市，特別係滙控（005），更係佢哋力壓嘅對象，所以，有理由相信，後市如果大升，踏入7月，又或者在6月底便開車嘅機會好大。
彩星集團（635）股價表現開始轉強，近幾日升後在1.60元水平整固，暫時受50日線（1.597元）牽制，若升破1.65元的近日高位阻力，再升之勢又可確認，照度上去，短線目標係1.85元。
彩星在美國知名度極高，而同業平均PE約15倍，因此，彩星若有意將玩具業務分拆在美上市，係好順理成章之事，屆時，彩星股價會見幾多？
05年（12月年結），大行估計彩星獲利2.9億元，升47%，由於早前到期的認股證全部行使（公司多4億元資金運用），每股盈利攤薄至15.5仙，升25%，若以分拆在美上市後的15倍PE計，彩星股價可見2.30元，上望升幅逾40%。
郭兆誠