星期五中午到九龍食飯，返到置地廣場地鐵站已經係下午兩點幾，醫生Ｃ正在地鐵站大堂，佢話：「我一點鐘去陸羽飲茶之時，已見一位打扮成蜘蛛俠嘅人士坐響皇后戲院前嘅大螢幕之上，搞到交通大亂，𠵱家佢重未走呀，快啲去睇吓。」
於是三步夾埋兩步走，上到去娛樂行前，呢位「蜘蛛俠」仍然坐在大螢幕頂，警察封咗條路，巴士汽車不能由大道中往西行，雲咸街嘅車唔准左轉，咁就慘矣，塞死晒。呢位仁兄搞邊科呀？佢原來放咗一大塊黃布落嚟，上有黑體字——天安門廣場：一九八九年六月四日，公義必勝。行人遊客路過，紛紛用手機影佢相，唔少行人話呢條儍佬搞乜鬼？每年六四都有燭光靜坐晚會，估唔到今年會有人扮蜘蛛俠。
與六四或有關連嘅程翔被捕案，引起好多記者關注，FCC（外國記者會）臨時召開緊急講座，星期五下午三至四時舉行，請湯家驊、吳靄儀、梁家傑、劉敏儀（程太）到場發言。左丁山睇蜘蛛俠，企咗街上一陣，發覺已經係二時四十五分，唉吔，走上FCC聽程翔事件講座好呢？還是返公司做嘢？猶豫未決之際，手機響起，卜架Ｔ來電講：「喂，神華上市，你要唔要番啲呀？」咁好服務？舊年領匯上市，佢唔得閒覆電話喎，唔通神華上市，反應麻麻？卜架Ｔ好坦白咁話：「呢隻IPO晒士太大，上頭要我哋拉客入票，幫吓手啦，希望有幾倍超額認購，有得交代。」
經佢一講，惟有走番上公司刨吓本神華招股書先。卜架Ｔ舊年有個客借孖展錢買領匯，勢估唔到領匯俾盧婆婆一棍扑中，上唔到市，呢位客戶損失利息三十萬，至今仍然嬲到死。卜架Ｔ梗係講佢唔掂入紙申請神華，先至想起我哋呢啲小客戶啦。