馬丁同肥平噚日去梁家傑嘅地區辦事處捧場。馬丁身為客人就好唔客氣，佢批評45條關注組應該要改名，因為《基本法》出事嘅唔只得四十五條，重有四十六條、五十三條等條文，不如改名叫「基本法關注組」算啦！
踩完關注組，馬丁又寸傑哥老積。馬丁話，第一次見傑哥時，傑哥重讀緊U，傑哥有次嚟搵佢自我介紹話「我係梁家傑」，李柱銘即刻叫傑大哥做「ProfessorLeung」。馬丁嘅黨友涂謹申踩多腳話，當年傑哥喺華仁，啲師弟個個問：「呢個人咁古肅嘅？」每次傑哥行過走廊，就會有陣「正氣嘅風」由走廊吹嚟。傑哥嘅黨友吳靄儀就孖叉馬丁，叫佢哋改名係「對關注組不敬」！肥平噚日就讚傑哥好多公職，有心貢獻香港。成日有人放風話煲呔要叮走肥平，八方問肥平：「煲呔道德水平低唔低？」佢九唔搭八話：「我一定支持佢。」
傳真︰2623-9278
電郵︰[email protected]