煲呔曾選戰進入高潮，終於遇到明箭，董家班中嘅忠心老將鄔維庸率先發難，公開話阿煲呔「道德水平」唔高，嘩，呢一擊都好毒啫。咁其實高道德指乜嘢呢？大概鄔醫生係話煲呔自己身為董生嘅左右手，首輔之責點可卸膊，香港七年惶恐，慘過梁天來，佢講到同自己無關咁，冇膊頭，即係冇道德。
鄔維庸「不識時務」
平機會一役，鄔醫生何局長等人在中環開秘密會議，卒之搞到王見秋冇得撈，咁自然好冇癮，更冇癮係煲呔一掌權，就將平機會全棚換晒，鄔醫生條氣唔多順可以理解，不過，現時全城一齊擦鞋，三個月前死頂硬挺董政權者，三個月後轉晒軚肉麻捧曾，講到佢天上有地下冇，咁當然係因為胡握手六秒之後又再握十一秒嘅原因，難得呢個鄔維庸唔識時務，竟然咁夠膽反曾亂中，乜佢唔驚第日人大政協都冇得做乎？
香港究竟要一個高道德水平低辦事能力，抑或一個淨識做嘢唔講仁義嘅世界仔特首，真係開十場大辯論，都未必有答案。
煲呔選戰得到一班國際級精英助陣，當然公關一流，呢點唔使鄔維庸褒獎，但係身為政務司司長時嘅責任，佢隻字不提，宣布參選時多謝完屋企人，多謝埋公務員，幾乎乜人都多謝晒，都冇多謝一聲阿董生──話晒都係佢唔掂又肯認腳痛至有黃袍加身機會──又難怪左營忠實擁躉條氣難下嘅。佢哋雖然礙於壽爺面子，唔好意思亦唔敢反枱拆牆，但暗箭同金手指，篤吓你好難免，煲呔競選辦嘅國際精英軍團，接招啦！
前朝忠臣世界仔多
鄔醫生帶頭叫陣之後，會唔會有其他前朝忠臣企出嚟呢？睇嚟又未必，因為佢哋之中，亦係世界仔居多，當日支持阿董，同今日支持阿曾，其實都係為自己啫，點有鄔醫生咁高道德、或者咁戇居呢！
傳真︰2623-9278
電郵︰[email protected]