觀塘apm商場開業個多月，人流已經相當不俗，新地宣傳攻勢仍不怠慢，為推廣獨有夜行零售概念，大搞夜貓購物激賞，今個月內，逢禮拜一至四，夜晚十點至凌晨兩點，凡買嘢滿三百，就送夜場戲飛一張，重可以參加有獎遊戲。
其實apm搞夜行零售有一定難度，事關無論上班族抑或上學族，多數都等到禮拜五同周末，至會狂歡至深夜，店舖日以繼夜經營，成本都唔輕，請sales都難啲。
不過，話時話，apm除咗帶旺同區商廈市道之外，亦令到的士行業受惠。早排蘭西睇完午夜場，散場都成兩點鐘，行返去對面裕民坊，好容易就搵到的士坐。個司機話，apm開咗，佢哋深宵生意都多番，唔使等太耐，已經有客。
按九成半起泡沫
經常都有人話，當師奶阿叔都走去瘋狂炒樓炒股，就係大跌市嘅徵兆。
蘭西有次去屯門做嘢，搭小巴時，聽見兩個去緊街市買餸嘅師奶大談樓市，其中師奶甲聲如洪鐘咁話，個市升咗咁多，買樓咪搵自己笨？
師奶乙都贊成，之但係佢話，隔籬屋個師奶丙，啱啱又買多咗個單位用嚟炒，佢嫌股市賺錢太慢，不如買多幾層樓，等升值好過。
師奶乙見師奶甲一臉疑惑，就解釋話，師奶丙係申請九成半按揭買樓，加上屯門樓百零萬已有交易，買兩間，首期都係十零萬。講到好似唔使供咁。
樓市真係潛在唔少泡沫，果真爆破，呢鋪都咪話唔傷。
代理花臣推員工
樓市急轉直下，已經係事實擺在眼前，靠佣金搵食嘅地產代理行，耐唔耐就要搞吓花臣，鼓勵員工，繼續衝呀衝。
中記搞咗個「極速起動大獎」，員工喺今個月七號之前，凡係促成交易，不論一二手、租或售，都可以攞到件奧地利水晶獎座，名額三百個。
美記就出動紀念版瓷杯，獎勵最快促成交易嘅員工，名額同樣三百個。
話時話，點解無端端會走隻紀念版杯出嚟？其實係美記慶祝上市十周年嘅活動之一，佢哋喺馬來西亞訂購咗一批紀念版錫杯，諗住送畀一批貴賓。
返鄉下新都城筍賣
今時今日，返鄉下歎世界，仍然係唔少老一輩嘅心態，將軍澳新都城啱啱有個老街坊，不惜以低於市價賣樓，帳面賺咗二十零萬，返大陸長住。
利記高世聰話，單位係都會豪庭三座低層G室，八百六十六呎，造價約二百五十七萬，每呎唔使三千蚊，低市價八個巴仙。原業主喺○二年買入，當時嘅價錢係二百三十幾萬，𠵱家除清雜費後，仍然有賺。
其實佢早已移居內地，長期丟空個單位，為咗圓歎世界美夢，反正又可以套現，平平地賣咗佢好過咁話。
皇御居押後
近期樓市氣氛明顯轉靜，新盤開售都要諗過度過。羅家寶百樂集團發展，首個住宅項目沙田皇御居，上個月先至講緊七月發售，𠵱家都因應市況咁靜，延遲到八月尾、九月頭。
皇御居雖然係百樂第一個樓盤，不過，佢哋嘅市場觸覺一啲都唔輸蝕。
負責銷售同策劃嘅中記話，皇御居剛剛攞咗滿意紙，現場搭緊示範單位，預計八月先至完成，到時可以配合推售。
中記董事阮錫章話，皇御居意向呎價七千蚊，勢成該區新指標，所以要等到市場條件配合，先至推售。
電郵地址：[email protected]
