細架又細價NECN190$1,480登場

本住《鋼》之「等價交換」法則，好多人都會將小巧手機同價錢掛鈎！好似𠵱家手機界「卡片」之王──NECN923，纖巧則纖巧矣，但索價$3,680！真係唔係咁多人買得起。NEC最近新推了一款廉價版的骰手機──N190！機身表面細過八達通、更細過N923，只是將機身略為加厚！新機落地價$1,480，價錢平一半都唔止，學生哥都隨時負擔得起！

記者：陳國輝
攝影：梁細權、朱崇德
ImageGirl：家琪

「機場」Sales報料，NECN923可以話現時手機界數一數二細機，不過由於屬機王級別，當然唔係咁多人負擔得起啦！至於N1XX系列，一直屬入門級機種，功能基本，但就以價錢平取勝；今次最新N190驚喜者是價錢一樣Keep得住，但機身尺寸就大縮水，的確好大進步！至於手機來源地方面，老機迷都知，近年NEC都係行大中華策略，先喺國內出機，然後先再諗香港Market，所以今次N190第一手新機，都係來自國內嘅水貨，至於行貨方面，則暫時未知出機時間表。

■將NEC小巧機王N923一拼，N190機面足足細咗一個圈。

■不過厚度方面，N190就輸番成個Double！

66g超輕量級

無論係似MP3機定紙巾，設計小巧緊湊嘅N190的確好討人歡心；手機走入門級路線，所以都係行基本GSM900/1800，機身僅重66g（輕N9234g），真係有種「生命中不能承受的輕」之感！機面LCD屬羽量級1.3"，不過由於機身太細，再加全鏡面嘅錯覺，一眼望落去感覺幾開揚！畫質都係行基本的6萬5千色（128×160），但仍然能給人一種好色、細緻嘅感覺，老實講！全卡通式操作介面在此應記一功，時時刻刻都以最繽紛面目示人！
講開卡通人物，不得不提手機內置了一個好獨特嘅卡通人物「化身」功能，用家可以根據自己喜好，從眼、耳、口、鼻、髮型及衣服等選項中，自行設定「來電卡通人物」，據知裝扮配搭之變化不下於150種，感覺幾新鮮！

■「化身」功能入面約有150種不同裝扮配搭。

■Model小姐話，鏡面設計最受女仔歡迎，可以當化妝鏡嘛！

■黑暗環境底下，會發現按鍵上有冰藍色燈光。

30萬像素鏡頭　好DCFeel

機身雖然細，但反轉機身一樣配備有30萬像素鏡頭！質素唔算太差，不過鬼馬處係影相時會發出「咔嚓」一聲，都幾鬼相機Feel；另外機側重設有兩粒獨立按鍵，手機備用情況時只作音量調校，但當橫置作DC模式時，就馬上變成相機快門！
至於DC功能方面，感覺幾全面，4×數碼變焦屬必備，不過平價機都玩到9連拍又真係幾驚喜！10種相片框架、懷舊照、負片拍攝特效，感覺都好鬼DCFeel，不過更難置信是機身內置有「相片編輯器」，可在數碼相片上自行加字、調校顏色，真係千零蚊嘅入門DC都未必有佢咁多嘢玩！不過唯一缺陷是機身並未有設置擴充插槽，影相、錄Movie都只可靠晒機身5.5MB內置記憶體，略嫌唔夠使！