韓國人氣偶像組合神話，喺日本被視為韓版SMAP，佢哋近年非常受日本女士歡迎，前日組合喺首爾舉行歌迷聚會，有唔少日本fans特登飛去見偶像，重喺台下向偶像放紙飛機，而神話唔止請fans上台跳舞玩遊戲，重投懷送抱，冧盡在場每位日本女fans。
由Eric、Andy、MinWoo、Hye-Sung、JunJin和DongWan組成嘅神話，前日喺首爾搞咗個叫「神話SummerStoryFestival2005」嘅歌迷聚會，當日嘅活動主要係邀請日本嘅fans參加，唔少日本OL同師奶fans都專登聯群結隊，搭飛機去參加活動，重有靚女fans着住日式浴衣出場，感覺清新。
推動韓流獲頒獎座
神話為咗一班日本fans出盡法寶，佢哋唔止同班火辣性感嘅舞蹈員又唱又跳，而且重拉埋fans上台齊齊跳㖭。幾位靚仔除咗幫fans簽名外，又向fans投懷送抱，任攬唔嬲，令一班fans神魂顛倒，佢哋為咗表達對神話嘅愛，重將已經寫好嘅fans信摺成「愛的紙飛機」，飛向偶像㖭。
此外，韓國觀光社為表揚神話推動韓流，吸引咗唔少日本fans飛到韓國旅遊，所以當日頒發紀念獎座畀神話，而隊長Eric就做代表上台接受獎座。