香港骨髓捐贈基金聯同蘋果日報慈善基金喺上月二十八、二十九日，假將軍澳新都城二期商場舉行「骨髓捐贈驗血大行動」，為等緊骨髓移植嘅美國十九歲華裔血癌女學生譚文筠同其他血癌病人搵合適嘅骨髓。
今次一共有二千四百幾人參加驗血，成績算係唔錯。血液樣本已經送咗去美國化驗，一有好消息，大使會為大家跟進。
為救人衝破障礙
兩日驗血行動大使都有到場採訪，見到唔少感人場面，有幾位市民因手臂血管太幼，拮咗四、五針都冇血出，但佢哋眉頭都冇皺一下，最終成功抽血；另外，有一位女士抽完血之後忍唔住喊咗出嚟，原來佢本身好怕見血，為咗救人佢都衝破心理障礙，真係好難得。
今次驗血行動可以順利完成，除咗靠二千幾位熱心市民支持之外，亦要向以下人士及團體講聲多謝。
致謝名單
立法會議員：李華明、湯家驊、譚香文、梁耀忠；立法會前主席黃宏發、立法會前議員黃成智、有線電視前記者張寶華、藝人：殷莉、鄭希怡、吳浩康、李逸朗、蔣雅文、王凱駿、余文樂、關心妍、方力申、古巨基、張栢芝、周麗淇、羅嘉良、薛凱琪、林家棟、劉德華、王菀之、官恩娜、梁奕倫、車頤
商戶：人人汽車有限公司、進智公共交通控股有限公司、匯泉國際有限公司、奇華餅家、將軍澳新都城商場
機構：影音使團
暖流熱線
電話：29908688
傳真：23702192
電郵：[email protected]
網址： http://www.charity.atnext.com