呢排大市沉悶，連小初都悶到暈，好多時手痕想搵嘢炒，但偏偏又冇對象，認真難搵食。經紀黃同小初講，財不入急門，大市沉悶時，可留意股價偏低的股份，好多時係收集良機。
例如今年1月底上市曾哄動一時的王朝酒業（828）就係值得留意的對象，隻股上市時招股價2.25元，最高炒過上去3.575元。公司在4月公布04年全年業績，盈利上升逾4成至1.76億元，但股價就唔多掂，近排最低跌過落去2.60元，上周五冇起跌，平收2.75元。
經紀黃又話，王朝股價不振，主因係廠房使用率接近爆燈，擴建工程起碼要在明年中先至完成，分析員估計05年業績唔會有大增長，而王朝當時股價仍企喺3元水平，比招股價升逾3成，有人沽貨獲利令股價下跌，實在難免。
不過，王朝股價跌到現水平，相信要沽貨嘅都沽得七七八八，公司家陣sell緊06年及以後的中國葡萄酒市場，現價有一定值博率。
慕容小初