城市脈搏1：<br>《下妻》駕到！旺角Loli俾人狂昅

城市脈搏1：
《下妻》駕到！旺角Loli俾人狂昅

今個六月，全港Lolita空群出動熱爆街頭、姊妹花狂車Loli衫生意做唔切、喱士娃娃裙全面攻入女人街！全因一套未上映先Hit爆的日片《下妻物語》，主角深田恭子狂晒39套Loli服，誓將香港Lolita風潮推到摸頂位。呢套戲今個星期四（6月9日）正式上畫，你有冇興趣齊齊投入她們的法國「洛可可」華麗年代？

記者：馬慶武
攝影：伍慶泉、楊錦文

■昅完影埋相！

■Oh！ReallyPretty！

■食環署都昅！

■學生妹又昅！

高潮一：車衫車到冇得瞓

專賣Lolita衫的Spider開業年半，因為全部衫都係自家設計親手縫製，唔似其他舖頭交畀大陸廠大量生產，而且客人重可以指定款式，甚至漫畫裏面的款都得，深得港產Lolita女歡迎。老闆Natalie妹妹同Queenie家姐話，由於《下妻物語》即將上映加上傳媒勁煲，令這股暗湧已久的Lolita熱潮Hit上加Hit：「呢排晚晚收工都狂做衫，晚晚都只瞓得3、4個鐘。近呢一、兩個月平均每個周末都賣到接近20套，忙到街都冇出好耐喇！」
Queenie重話以前一向都係熟客幫襯，𠵱家就多咗好多新加入Lolita行列的女仔，後生啲讀緊書的就多數買可愛行先的SweetLolita衫，成熟少少的OL會買Gothic衫去宴會，因為搶鏡得嚟又夠高貴。咦？咁計吓計吓，你哋成個月營業額咪隨時過10萬？

售賣點：Spider（旺角瓊華中心130號舖/27409366）

變身前

變身後
■妹妹Natalie：「SweetLolitaLook必備頭飾，除咗頭上面呢個縛嘅BB帽，重有頭箍、髮夾等頭飾，誇張啲嘅重有大大個蝴蝶結。」

Lolita的華美衣櫥

■超純的白色Lolita套裝，喱士花邊，下身重有玫瑰圖案。（上衫：$350、裙：$360）

■碎花連身裙，冇得左配右搭，但腰部有交叉收腰索帶，係Classic款式。（$780）

■粉紅色最受少女歡迎，心口重有蝴蝶結，好有小甜甜Feel。（$680）

■同樣係連身裙，裙腳剪裁更加精緻，高貴度更高。（$780）

■加上喱士邊及蝴蝶結的長襪，顏色長度都同LolitaLook襯到絕。（$80）

■大大個蝴蝶結頭箍有大量喱士圍邊，「卡娃兒」程度爆燈。（$180）

■Lolita都要帶手袋出街，呢個喱士玫瑰手袋就一定唔會破壞一身可愛LolitaLook。（$380）

高潮二：發現港產Loli男

人辦一：女友強迫我變身
陪Loli女友睇完《下妻》首映的Alex話：「我覺得Lolita裝都好靚，女友迫我襯番佢，所以成套衫都係佢幫我做嘅。其實我都覺得OK，都唔算誇張嘅，好彩……唔係唔係，可惜我平時返工唔可以着啫。」（女友企響隔籬，唔敢講真話！）

人辦二：24小時瞓覺都要着
寶寶係中日混血兒，愛上LolitaLook3年，全屋都係Lolita衫（只得一件士啤便服），買件睡衣都要自己加喱士改裝，連去葬禮都係全黑Lolita服！佢話上年已經喺日本睇咗《下妻物語》，好好笑喎！

人辦三：誘惑家姐變Loli
Natalie以前玩開Cosplay，為自製靚衫沉迷到去製衣業訓練局讀時裝設計，3年前更全情投入Lolita懷抱！家姐Queenie正係受妹妹感染，最後齊齊開舖整靚衫，十足十戲裏面的桃子（深田恭子飾）變身Lolita製衣專家。

高潮三：女人街Loli貨殺到

Queenie同Natalie推介各Lolita妹想買平靚正的全套「補強」裝備，不妨殺落女人街同花園街。不過近期花街、女街的檔主亦都自發性向Lolita裝埋手，潮人愛蒲的出口店「美芝」喺牛仔褲、古着堆中就突兀地有兩套Lolita衫賣，另外頭飾檔、帽檔、手袋檔亦加入大量喱士製品，不得不讚呢兩條街的檔主，果然走在潮流尖端（拮手嗰隻）！

即Check女記潮貨！