英超聯冠軍車路士繼非法接觸阿仙奴後衞A高爾，結果被罰款處分後；日前再被傳出無視合約精神及英超聯規例，欲以銀彈撬另一同市球會熱刺嘅足球總監晏尼臣過檔！雖然「有錢使得鬼推磨」，但呢勻若搞到自己未踢下季聯賽先被扣分，真係唔抵可憐。
「以金錢摧毀足球世界秩序」
呢次事件，已經搞到晏尼臣表態想走人，迫得熱刺要對呢位重有三年合約未履行嘅「足壇新星伯樂」，即時採取停職處分行動；明顯地已對熱刺喺嚟緊賽季嘅組軍行動構成重大影響。
另一方面A高爾亦因為同「車仔」私下洽談事件，觸怒咗阿仙奴，呢位英格蘭國腳後衞更反指球會高層當佢係儍仔；𠵱家喺球會前途亦變得不明朗。難怪再發生晏尼臣事件，即引嚟更多球圈中人指摘「車仔」，話佢哋正用金錢摧毀緊足球世界嘅秩序。有法律人士重預計「車仔」將會被扣最多十二分。我求大俠亦贊成，咪等佢哋真係好似有錢大晒咁款！
賀5奪歐冠盃樂極忘形利記「巴士」撞凹盃柄
利物浦重奪失落二十一年嘅歐冠盃，班球員喺慶祝時樂極生悲，唔小心將個盃跌咗落地，搞到撞凹咗其中一隻柄；而因為紅軍五奪歐冠盃，所以可永久擁有呢隻盃，但佢哋話為咗令隻盃原汁原味，冇打算整番隻柄。究竟邊個咁粗手粗腳？聽講好似係成日俾人傳會走嘅巴路士。
世青盃周五開鑼馬會爭唔爭食快有分曉
歐洲五大聯賽雖已收咧，但六月份仍好戲連場，其中洲際國家盃喺十五號開波，世青盃則早五日喺十號開，收費台重全程直播㖭。雖則世青盃係𡃁仔賽事，但有瑞士辛德路斯、荷蘭C約翰同西班牙費比加斯等英超兵參賽，所以馬交方面亦有開盤。咦，唔知足智彩會唔會開埋一份呢？
硬啃華倫苛刻條件古華特金童變爛銅
荷蘭射手古華特出名麻煩兼「高薪一族」，日前華倫願意接收呢嚿「舊電池」，但係年薪就由六百萬歐元（約五千七百萬港元）激減至一百二十萬歐元簽三年。而華倫講明如果佢場表現唔規矩，就隨時減年薪同合約。古華特當年都算係歐洲金童，𠵱家搞成咁都幾心噏。
逢周一至周五見報