上周五美股唔對辦，港股暫時冇運行。造淡搵食好過造好搵食，價錢適中嘅話，買P輪好過買C輪。
中企P輪4761：國內股票近排跌到一仆一碌，H股下跌嘅亦唔少，但國指跌幅仍然唔算大，主要因為有啲重磅成份股好硬淨，例如中石油（857）成日高企，高企係因為油價上升撐住，但國指遲早都跌番夠。
中企指數P輪買得過，炒得熱熱鬧嘅有3729，輪價11.5仙，溢價0.3%，槓桿率17.2倍（有效14.1倍），引伸波幅20.6%，每日成交幾億份，上車後一兩個鐘頭，已經知道贏輸係點，冇悶場，但要留意本月23日最後買賣，剩番14日交投，輸咗冇得守。
遠期啲嘅，4761數據冇得彈，10月尾先至夠鐘，輪價25仙，溢價1.7%，槓桿率8.7倍（有效6.2倍），引伸波幅21.8%。咪嫌槓桿率細，溢價低補番數。
國壽P輪4859：國壽（2628）上周收5元，喺5元樓上撐咗好耐，估計始終撐唔住，執P輪有錢賺，對象係4859，11月初夠鐘，輪價39仙，溢價2.8%，槓桿率12.8倍（有效7.4倍），引伸波幅21.9%。國壽P輪得4隻，要落手，4859條件算最靚。
章盛