程翔最近被困京城，外交部話佢做間諜，真係令人難以置信，因為程翔同佢太太劉敏儀出名對國家第一種忠誠，唔係點會當年被金堯如老總收為部下，人工少少，做個記者仔？
就算佢哋六四後猛然醒覺起嚟，變成第二種忠誠，都一定唔會做對唔住國家嘅事。不過共產黨成日都你鬥我、我鬥你，點知今日邊個話事，所以愛國係好危險嘅事業。
八方聽聞自從事件公開之後，劉敏儀唔敢看報，電話亦聽唔切，最後索性唔聽電話，亦唔接受採訪，乜都叫記者搵記協轉達。連上周五警察上門想將份「監視居住」嘅通知交畀佢，佢都聽唔到有人敲門，要到星期六大家先接觸到。
劉敏儀同朋友講，佢最想澄清程翔唔係為某某領導人工作，佢丈夫好有原則，凡對中國統一及香港管治有利嘅，佢都會支持。
傳真︰2623-9278
電郵︰[email protected]