劉千石自從唔再做支聯會常委，佢嘅行蹤同政見都好飄忽，早前嘅遊行佢話去咗廣州探阿媽唔見人，俾人猛咁追問，當時佢回應過六四晚會一定會到。
阿石果然有信用，前晚喺維園，佢獨個兒坐喺台前嘅人群之中，八方起初都發覺唔到，後來佢位助理蔡耀昌帶路，八方先見到佢喺度靜坐。以前阿石一定企喺台上大聲疾呼，帶頭叫平反六四，但係呢個已經成為歷史，佢同八方講，冇做常委，就唔會再企喺上面。
六四晚上，天公不造美，半場忽然傾盆大雨，企喺台上嘅鄭家富哋冒雨趕快收場。佢噚日同八方講開，話場雨真係好奇怪，因為中環同北角都冇落，唔通真係咁局部地區有大雨？
黎樹雄攝
傳真︰2623-9278
電郵︰[email protected]