呢一集《星戰》得喎，悶咗兩集，劇情終於入肉，節奏重居然明快，一方面係戰爭片，另一方面又係俊男美女嘅埕埕塔塔ChickFlick。
觀眾已看過第一、二、四、五、六集，許多的謎團都靠晒呢集第三集來說明，咁多個劇情上的窿要填，又居然俾魯卡斯填得密密實實，黑武士由正變邪，除了性格中的復仇基因特別強之外，最關鍵的是愛得失去理智，怒髮衝冠為紅顏，連尤達大師多番用佛偈勸佢「LetGo」都冇用，結果開關引黑勢力入侵。當劇情講到黑武士終於着起套盔甲，帝國主題音樂響起時，戲院內的星戰迷們，有人歡呼，有人拍手，有人對銀幕揮手，有個重揦起支玩具激光劍在揮舞，恍如老友重逢，場面都幾滑稽而感動。
Jedi武士中咩星球人都有，唯獨是欠了一個唐人，你話如果發哥有份做Jedi，揸住支激光劍好似《臥虎藏龍》咁係咁舞，亞洲市場閒閒哋收多幾千萬。
魯卡斯導演的設計才華實在沒話說，二十年前的design在今天看來仍是有型，R2D2機械人尤其耐看，在今集中更表演出色，擔起了插科打諢的任務，引發了觀眾很多笑聲。
讚一讚中文字幕，人物姓名一律用英文，力保原汁原味，中文繙譯得簡潔傳神，尤其是尤達大師的智慧對白，譯得頗具禪味。講開尤達大師，總覺得佢個頭好似菠蘿包，好似好好味，若果尤達大師不慎撞機跌落中國某處，最終結局可能係俾人當野味燜咗嚟食，好味道！