男子組合ILoveUBoyz噚日拍攝佢哋嘅新歌《艾粒情歌》MV。係人都知少爺占同Donald有好多古精靈怪嘅諗頭，佢哋話恨咗好耐喺自己個MV入面有女主角，今次終於俾佢哋恨到，佢哋公司搵咗個身材好好嘅女模特兒Nicole做主角。
無得清場
ILoveUBoyz噚日扮到好怕醜咁坐喺床上面，重伏咗喺女方嘅膊頭度。之後猛咁讚對方正，Donald話：「我哋會慢慢培養情緒，唔排除有乜事發生呀？希望一陣拍MV拍耐啲啦！」
而少爺占就講笑話：「我之前唔記得咗着條保護性強啲嘅內膽褲，我只係怕走光啫！但係我哋又唔係啲阿哥阿姐，唔可以清場拍㖭！」
少爺占又話呢首歌會搞到好立體化，俾人有實在啲嘅感覺，希望大家睇嘅時候可以熱血沸騰。而呢首歌其實係講每個少年都有被迷惑過，少爺占話：「我都有呀！我細個就鍾意葉子楣，𠵱家就鍾意林志玲。」
徐若瑄向大冰雹許願
徐若瑄出道十五年，日前首次到內地宣傳新唱片《狠狠愛》，但卻碰上生平第一次見嘅大冰雹，徐若瑄竟興奮地許願，佢話：「狠狠愛，狠狠賣，遇水則發，遇冰則一定狂賣。」徐若瑄此行也是首次接拍內地嘅女性用品廣告賺取人民幣。
廖啟智等收神秘禮物
廖啟智噚日帶咗兩個囝囝出席尖沙嘴舉行嘅《我們都是父母》記招，智叔遲啲就會同何秀蘭主持呢個有線節目，問智叔父親節點慶祝？佢話：「其實年年都冇乜特別，啲仔都係畫張畫送畀我。」智叔個大仔一聽到即刻搶住講：「今年唔同，我同細佬諗咗啲嘢送畀爸爸，一定唔係畫畫。」
陳慧琳池珍熙意大利拍MV
駐港韓國大使館噚日向MTV台透露，陳慧琳（Kelly）將會喺八月同韓國男星池珍熙遠赴意大利拍攝音樂特輯，池珍熙會喺Kelly嘅四首MV中出現，當中包括《大長今》主題曲《希望》嘅國語版。韓國大使館重表揚Kelly推動韓風所作出嘅貢獻。
鋒菲戀重溫舊夢
田雞同肥仔聰前晚喺亞視錄影《一舉成名》，今集有位參賽者葉菁菁扮王菲，叫做「武漢王菲」，另一位參賽者余朝偉就扮「上海謝霆鋒」，兩個重拖住手出場，實行擺王菲同霆鋒舊戀情上枱。田雞首先問「武漢王菲」：「你唔係就嚟嫁畀李亞鵬咩？重同霆鋒拖手。」「武漢王菲」話：「係呀，我重溫舊夢嘛。」真係好抵死。
