勁歌熱舞搞氣氛
賽會為搞好場波嘅氣氛，除安排咗大班外籍少女啦啦隊，為傑志同祖記打氣之餘，重搵咗本地混血歌手紀嘉利，加埋兩個舞蹈藝員現場勁歌熱舞高唱傑志嘅主題曲playmygame，雖然球迷對紀嘉利唔算好熟，但現場所見好似幾受落。
金童人氣始終最勁
雖然迪比亞路近年人氣稍跌，不過，佢始終都係一代「金童」，首次到港就吸引到唔少男女FANS着晒印住祖記件十號波衫捧佢場，而佢帶隊入場之時，尖叫聲不絕，風頭完全蓋過尼維特、查斯古特同杜林，呢位主角亦落力演出回饋球迷支持，當佢下半場被換時，就博到球迷熱烈掌聲。
林慶麟獲尼維特戰衣
三十八歲嘅傑志教練兼球員林慶麟踢完噚日對祖記嘅慈善賽就掛靴，結束佢二十年嘅球員生涯；而飛仔麟如賽前所講，半場成功攞到祖記「鐵人」尼維特件波衫作為紀念，換衫後佢重即時着起件衫畀記者影相。另外，噚日亦都係祖記一代守衞費拉拿嘅告別戰，佢退役後會轉做祖記青年軍教頭。
天公造美球迷收貨
噚晚深夜開始落雨，朝早重行雷閃電，當傑志、推廣公司同球迷都擔心場波打唔打得成之際，好在賽前兩個鐘頭天氣好轉，可惜一場攔門雨，令到祖記歷史性訪港只得萬三名熱情球迷入場；而迪比亞路同尼維特上半場各建一功，下半場傑志奮力追平，入場球迷應該收貨。