科技股上星期五炒到飛起，實達科技（706）冇乜點郁，短打有得諗。
實達PE19倍，唔係咁突出，但現金底厚，上年底揸住2.18億元，得一筆短期透支6779萬元，淨現金講緊1.5億元，折合每股0.285元，幾乎同現價0.305元睇齊。
再講，實達NAV0.64元，現價折讓超過50%，科技牌頭，折讓吸引。
實達今年4月公布收購北京「龍騰科技」30%，進軍祖國自動櫃員機管理解決方案業務，5月刊發04年度（12月止）年報講明，龍騰承諾未來24個月，純利唔少過4717萬港元。照計數，以實達所佔權益，純利亦唔少過1410萬元，當兩年平均入帳，05年度及06年度，各達705萬元，講緊又差唔多係實達04年度純利805萬元水位，實達業績應該有着落，之後24個月先再諗。實達上到50日線0.36元左近，每股淨現金比重，重講緊高達79%，科技股有勢，打鐵趁熱。
東強折讓大有得諗
東強電子（615）上星期五終於識得彈彈，14RSI重係低企23，當技術超賣冇到，又講兩點：東強上月尾涉及一壇專利權訴訟，確實賠償銀碼不詳，以原訴人暫時估計未支付專利費計，約莫4.7億元，東強受累，對上7個交易日中，頭6日插到開巷。東強家陣市值跌剩1.6億元，資產淨值7.44億元，折讓79%！折讓大到無倫，資產再打5折計數，折讓仍高達5成水位。
第二，喺0.5元揸東強嘅基金，持股量講緊係5、7%比重，呢期所見，再有大孖沙喺0.29元邊位上車，唔理係撈底定溝貨好，但成本價重好重磅，呢勻借力打力，應該有短線貨仔，但事先講明，博大茶飯暫時癡心妄想。
錢雋