廠家Ｓ收到理工大學之請帖，請佢去參加一個命名典禮。一聽見命名，就諗起香港大學嘅「李嘉誠醫學院」，點都八卦吓，問廠家Ｓ：「係唔係李先生又捐錢呀？」廠家Ｓ話：「唔係，香港有好多人肯捐錢嘅，唔止李先生一個，不過冇人有佢咁多錢，亦怕且冇人願意捐咁多錢。理工大學呢單命名典禮，完全冇人留意，你知啦，香港有好多發達廠家，知名度比較低，佢哋捐錢，傳媒唔會留意嘅，相信理工大學冇校友會反對命名。」
命名典禮喺七月四號舉行，由潘宗光校長主持，捐款人——益德集團（ACEStyleGroup）創辦人謝安如伉儷主禮。謝氏夫婦捐巨款（捐幾多，廠家Ｓ唔知），睇怕都有一、二千萬啩（當然愈多愈好），理工大學校園內之大樓，差唔多由A到Z座都有命名（如蒙民偉樓），最高嗰座行政大樓叫做「李嘉誠樓」，已經冇空位囉喎；點樣回報謝安如伉儷呢？廠家Ｓ話：「真係好橋，用一間學院命名。嗱，理工大學冇醫學院，唔會有醫生校友反對。理工大學會出現一間『益德內衣專業學院』，夠創意啩！」
吓，「內衣專業學院」，專研究造內衣褲㗎？廠家Ｓ話：「你對工業認識少，內衣係一個好大嘅行業，黛安芬都上咗市啦，研究、訓練內衣製造，係大學問嚟㗎！」「內衣」英文叫做乜呢？Underwear喎，會唔會難入耳少少？廠家Ｓ又鬧：「嗱，英文叫做ACEStyleInstituteofIntimateApparel，夠晒斯文。」又學咗嘢，內衣可以稱為intimateapparel，冇得彈。
各大學籌款，各出奇謀，理工大學與工業界最熟，校友之中，發達廠家多到數唔清，潘校長細心搵廠家校友，每個捐兩千萬，五十個就捐到十億，困難程度肯定低過香港大學搵醫生校友捐十億。暑假之後，特區政府就會推出matchingfunds，左丁山相信理大籌款唔會輸蝕畀港大。