陳奕迅在過去一年，遇過不少風雨及是非，不過幸福就好像摩天輪一樣，轉走了，又再轉回來。他的父親陳裘大因貪污罪成入獄，女友徐濠縈又被外間形容為愛花錢的女人，但這一切卻無損他與家人的感情，反而令他更加珍惜身邊人，除力撐女友外，陳奕迅與父親的感情亦因而更鞏固。
事業篇：
做好音樂為本
陳奕迅（Eason）於去年休業半年，今年全面復出，不過他在接受訪問時卻表示不認同外間以復出來形容他，Eason說：「我又冇退出過，又點可以叫復出呢？」
接受善意批評
Eason一貫愛拗頸的性格，在當了父親後好像改變了，沒以往般口沒遮攔，反而多了一點成熟感，問到女兒對他是否有一定的影響？Eason說：「係有影響，但唔係呢啲影響，我只係覺得好唔甘心，點解香港一個咁新潮嘅地方，互相批評嘅說話，點解唔可以接受呢？最緊要係去睇吓人哋係惡意定善意囉，不過我𠵱家明白到我係唔可以去取悅每一個人，𠵱家知有啲時候唔可以玩得咁癲，咁咪唔玩囉，其實啲人成日話我黑面，我唔介意㗎，咁每個人都有情緒，我唔會理囉。」
Eason坦言對最近再投入工作還未十分習慣，他說：「始終都休息咗咁耐，我差啲都唔記得咗自己係藝人。」他又不諱言早前演出的新城音樂會，感到有壓力，對自己的表現亦不大滿意，Eason謂：「我覺得自己太緊張，好冇自信，可能我怕衰，唔可以好似以前咁放，都係太過着意人哋點睇，我一向都唔覺得香港觀眾唔熱情，只要歌手可以搞起個氣氛，根本就唔使迫啲觀眾企起身，佢哋都會自動自覺起身。」
開拓內地市場
而在他休業半年期間，樂壇出現了新四大天王，包括許志安、古巨基、梁漢文和李克勤，最近更有人將Eason和古巨基比較，問Eason點睇對手呢？他坦言：「我覺得好奇怪，點可以比較呢？大前提係要做好件事，不如諗吓點樣可以做好啲歌，唔係要做啲嘢出嚟俾人批評。」
Eason直言其實自己野心很大，目標是希望開拓內地市場，讓更多人認識自己的音樂。而早前他在數碼港舉行的音樂會，Eason就表示非常支持這類型活動，他說：「可以令更多樂迷接觸到Live Music，係一件好事，可以令大家認識到乜嘢叫做音樂。」
家庭篇：
加深父子情
陳奕迅的兩首作品《單車》及《Shall WeTalk》的內容都是描述如何與父母溝通，相信這些作品以往亦曾經感動過不少人，就連Eason自己亦曾說以前與父親陳裘大溝通不夠，直至去年父親因貪污罪成入獄，今年經過上訴後，陳裘大可保釋外出一家團聚，這件事令Eason與父親間的關係更密切，亦更懂珍惜身邊所有人與事。
為女友講盡好話
Eason說：「以前唔係冇溝通，但係發生件事之後，我哋溝通更深入，其實嗰段時間真係好唔開心，我當然相信我爸爸，佢有冇做到其實已經唔重要，最緊要一家人一齊開心，咁樣已經好足夠，親人就係親人，你點都唔會想你嘅親人唔好。」
父親出事期間，外間曾有不少揣測，說他為了打官司，花費所有收入和積蓄，又說女友徐濠縈與其父關係惡劣，阿徐更被指每月花費比Eason還要多，令他感到很大壓力。
Eason亦承認當時的確有很多揣測，他說：「嗰陣時太多是非，我都曾經覺得自己唔知係咪有問題，有時都會亂咁講嘢。」
而Eason亦為女友阿徐逐一澄清傳聞，他說：「成日話阿徐嘥錢，其實佢不知幾慳，有時我使錢重大過佢，佢係應使先使嘅。又話佢同我老竇關係唔好，梗係唔係啦，有時我想同我阿爸講啲嘢，反而係阿徐幫我講，佢無形中就做咗我同阿爸嘅渠道。」
怕麻煩唔願結婚
Eason和徐濠縈的女兒康堤，現已八個月大，但兩人到現在仍遲遲未結婚，究竟所為何事？Eason表示只因工作忙兼怕麻煩，不過他卻承諾說：「我一定會結婚嘅，但就一定會低調囉，我最怕煩，我怕請得呢個又唔記得請嗰個，咁就唔好啦。」
原來Eason亦有憧憬在教堂內舉行婚禮，他說：「咁一世人一次嘛，梗係想着得正啲，咁都想個老婆着婚紗同自己步入教堂，幾好呀。」相信Eason這刻應該感到非常幸福快樂。
採訪：胡比
攝影：仇志德
場地：Neway
