社福界噚日搞咗個特首選舉論壇，雖然贏硬嘅曾蔭權冇出席，得番李永達同詹培忠兩個，但場面一樣針鋒相對，達仔話要先禮後兵，先要同對方握吓手，點知金勞詹就反駁話自己冇兵。
詹培忠喺會上重不時「寸」李永達，話佢生得矮，畀機會佢答問題先。當在場有人問佢哋兩位點睇政府要唔要制訂家庭政策，金勞又針對達仔，話佢家庭好複雜，應該唔敢答呢個問題，重話做人最緊要行錯路識返屋企喎，擺明就係數緊李永達曾經同兩個女人離婚又再娶番前妻，搞到達仔面黑黑。唔知論壇主持人吳志森係唔係睇唔過眼，當有社工問兩人對人口老化嘅意見時，森哥就要金勞答先，原因梗係同佢年紀有關啦。
爆料熱線：29290000、27860099
報料傳真：26239278
報料電郵：[email protected]