煲呔曾蔭權周圍推銷自己嘅治港理念，滙豐銀行亞太區主席鄭海泉喺其他場合，亦都畀咗小小貼士煲呔。佢話政治要有新嘅治港機制，好似前國務院總理朱鎔基話齋，千祈唔好議而不決，決而不行，令香港自己原地踏步，但係四周圍嘅地區，就繼續向前發展，咁樣大家都唔想。
佢話，過去幾年政府提過好多大構思，最後都落實唔到，令市場懷疑。其實香港由工業、運輸發展到物流、商業中心，政府都無講乜嘢，係香港自己不斷努力。佢話，香港唔需要話要乜嘢模式，政府應該喺架構、效率、人才等方面提供資源，支持教育、基建、法律等，為經濟自由發展提供更好嘅環境。
不過，講到底，鄭大班話，翻看煲呔紀錄，佢都以市場經濟發展為主導，並且奉行積極不干預政策，相信唔會有太大改變嘅，所以呢位滙豐大班，已經簽咗名去支持佢做特首。
當壓軸嘉賓講故事
其實，鄭海泉噚日出嚟見八方同埋行家，係為咗滙豐贊助嘅《滙豐為我講故事》活動，做壓軸嘉賓，同一班小朋友度過咗個好開心嘅下午，講咗個同運動有關嘅故事。鄭生話，自己以前都有同兩個囡囡講故事，而今次就第一次同咁多小朋友講故事。見到呢位大班，一班小朋友都有啲失控，節目一完，就湧上前同鄭生索取簽名，進取程度，真係犀利過八方同埋啲行家。
爆料熱線：29290000、27860099
報料傳真：26239278
報料電郵：[email protected]