日本動畫界除咗殿堂級大師宮崎駿之外，能夠與之分庭抗禮者，相信只有日本科幻動畫教父大友克洋！相對宮氏，大友克洋真係唔算多產，呢期最令人翹首以盼嘅作品，係籌備時間達10年、加總製作費達24億日圓天文數字嘅《STEAMBOY》；好多人正望緊佢幾時上戲院之際，估唔到DVD版搶先爆出，更「爆」者係佢全港限量3,000隻嘅雙碟特別版，勁炒上$450近一個Double嘅價錢，而且重要係有錢都未必買到嗰隻！
記者：朱崇德
發行：亞洲影帶
片長：126分鐘
格式：DVD9
聲效：dts5.1
語言：日語原聲、粵語配音（附中文字幕）
《STEAMBOY》限量雙碟版其實在上周末推出，特別處係隨碟附送電影解說圖集、海報、珍藏紀念冊、獨立編號飛行證之外，更令人期待者是Disc2的電影製作特典同大友克洋?鈴木杏訪問！由於全港限量3,000隻數量太少，基本上本周初已經開始出現缺貨，碟價亦隨即由$250搶上$350！發行方面為咗出碟應市，今個星期四再加推單碟普通版！但適得其反，由於碟迷發現「揚春」單碟版原來Bonus完全欠奉，限量版價格喺旺角進一步推高至$450；𠵱家市面一般碟舖都只係得番一隻、半隻看門口，所以見到啱就要快啲畀錢，相信全線斷貨，有可能係呢兩日內嘅事！
24億日圓大製作
唔講唔知，《STEAMBOY》前身其實只是1994年一個製作費3億日圓的40分鐘OVA計劃！但估唔到截至2004年內部試影，作畫枚數超過18萬張（相比於《千與千尋》更多），配樂邀請了負責《珍珠港》的SteveJablonsky擔任，再加大量的電腦CG後期製作，最終總製作費竟高達24億日圓，並成為史上「最高製作費用動畫」（《亞基拉》都只是1億日圓）！
事件發生在19世紀的英國工業革命年代，不過唔同者係佢哋唔止發明蒸氣機咁簡單，由洛伊德為首，及其子艾活的輔助下，發明了超高壓縮蒸氣技術的「蒸氣球」！呢種全新機械理論設計，能產生一種劃時代的龐大能源，並足以供應整個國家所需！英國情報組織以及一個名為奧哈拿基金會的黑暗組織，同時覬覦「蒸氣球」所蘊含的驚人力量，並希望將之用作軍事化用途；當洛博士發現這個背後陰謀時，原意想抽身兼將之寄存在孫兒雷利手上，可惜反令主角雷利也捲入鬥爭的漩渦。
近代科學的憂慮
大友克洋的作品，一向都充斥着末世紀荒誕，同以人類為本位對未來的不安及憂慮作命題，今次新作亦可以話如出一轍！觀後好多人都話「蒸氣球」設計非常「空想」科學！不過從文學思想角度；今日科技可以話從英國工業革命的蒸汽機所帶動，可將「蒸氣球」換成對「近代科學發明」是福是禍的一種憂慮。
其實現今的科技發明，一如大友氏所說，掌控在幾類人手上，一是全學究型的科學家，為發明而發明不理後果；二是功利主義的發明家，為成功、為求達到目的！而罔顧了社會公利；三是大財閥，專利用呢類發明家、科學家為搵錢工具，社會道義更為不顧；不過最令人憂心者，是一些國家級政要人物，每每想套用至新軍事發展上。
觀後覺得，大友氏今次的說故事本領強了！少了《亞基拉》年代的混亂感覺，主題清晰容易理解了，但視覺上依然充滿強烈衝擊；老實講，就算單碟電影版，$85其實都相當抵買，單就故事內容，已叫人一看再看來細味。
DVDPro（23326326）
地址：旺角奶路臣街6E德發商場地庫B4舖
