恒指波幅77點，埋單升3點，表面和平，實質窩輪市場一樣飛沙走石，升幅逾10%者接近40件，跌幅逾10%者超過30件。升得最厲害者升幅200%，跌得最慘烈者跌幅54%。
中芯C輪：美國晶片龍頭股英特爾預計前景好，中芯（981）彈出，大行出報告推一推，中芯好多二錢，收1.63元，升7.2%。於是，窩輪龍虎榜上，頭10件有9件由中芯C輪霸咗，其中4699飛200%，由1仙上到3仙，由地底價忽然翻生（暫時而已，下周再下周二，正股上唔番1.69元以上，隻輪依然變天津鴨梨）。
中芯C輪最旺場嘅係3868，發行量100球，單日就成咗486球，金額逾90球，前日原來只係得5球。炒家眼觀四方八面，喺正股頭15分鐘彈升幾格之後，即刻好似鯊魚聞到血腥，撲落3868。頭15分鐘買3868，到收市已經有利錢33%。隔晚有貨嘅則賺69%，收19.9仙。
炒中芯C輪，正路對象的確係3868，數據可以接受。想搏殺，3790啱啱哋。之不過，正股已升咁多，𠵱家至買C輪，已失先機。近期喺窩輪市場活動，高價搶貨往往閉翳收場。想贏個菠蘿包，最後可能輸隻大網鮑。
品質C輪：品質國際（243）業務涉晶片，升11.7%，收1.05元。公司輪153升128%，收26仙，打入10大榜。雖然長壽至07年10月夠鐘，但槓桿率得4%，畀98%溢價去追，唔係有病就係財多身痕。
章盛