近日大市最hot嘅話題，除咗大型新股之外，就係歐元滙價不斷下跌，神奇鐵股思捷環球（330）因為呢個原因，由59元高位一條氣跌到落噚日嘅53元。
經紀黃話，其實重有其他公司受歐元下跌影響，例如股壇長毛都揸住成幾個巴仙的新確科技（1063），因為9成生意來自歐洲，所以近排股價走勢亦唔多好睇。
新確去年在歐洲的室內無線電話市場，位列第2大供應商，市場佔有率由03年的18.5%升至21.2%。公司早排曾經講過想拓展美國市場，但當然唔會咁快就見效，對新確近期跌勢，基本上冇乜支持作用。在過去1個月，新確由2.60元水平下滑，最低見過2.175元，昨日則收2.30元，冇起跌，成交金額154萬元。
另外，日前中外報章大版報道，話美國有錢佬杜林普高價出售曼克頓地皮。原來連好多香港大孖沙都有份，老虎仔的遠東發展（035）都話有份，重賺成幾個開，但消息刺激有限，遠展最高見3.30元，收3.20元，升咗4％而已。
慕容小初