將軍澳區多藝人聚居，蘭西有次搭的士，聽個司機如數家珍咁東指西點，一路講邊幢樓有邊個藝人住，睇怕啲街坊應該時不時撞到啲藝人。
最近呢區又有藝人入市消息，主角係劉小慧，市場話佢用一百六十九萬，買入旭輝臺二座高層A，六百二十五呎，每呎二千七百蚊，市價。不過，單位唔係佢自住或投資，而係畀佢長住澳門嘅媽咪，嚟港嘅時候用。
據聞，今次一直都係劉媽媽睇樓，睇過十幾個盤，包括新都城，但最後扑槌旭輝臺，其中一個原因，係有親友住喺度，方便照應。
劉小慧拍過戲同唱歌，當年最多一識嘅一首歌係《初戀情人》，同期嘅藝人有湯寶如及黎瑞恩。
兆安李太轉戰九龍
兆安李太日前以九千幾萬，買咗尖沙嘴幸福大廈孖舖，噚日以三千四百六十五萬，賣咗銅鑼灣希慎道二至四號地下十號舖，持貨一年零八個月，就勁賺差唔多千七萬，升值九成四。據悉，買家係英記茶莊。
呢個舖由雪中情甜品餐廳租用，月租十萬零八千，以李太買入價計，回報高達七厘三，新買家接手就得番三厘七，都算幾進取。
炒慣港島舖嘅李太，可能見銅鑼灣升得咁上下，係時候轉移陣地，過海炒吓。
坪洲旺舖租金平
坪洲豆腐膶咁細，人丁多極有個譜，當然唔可能有大商場啦，咁睇，當地啲地舖都應該唔會貴得去邊。
環亞物業有一個坪洲地舖代理拍賣，面積四百呎，開價十七萬。不過，蘭西就留意到，個舖附有租約，月租千六蚊，咁計落，呎租四蚊，同新界工廈租金差唔多。呢個島嘅舖租幾錢一呎，相信一直都冇乜人知，呢個係咪可以做參考呢？
究竟有冇人有興趣，買唔買得過，就真係好難搵人畀到意見嘞。
坪洲雖然住喺度嘅人少，但愉景灣好多住客，都會坐船過去食嘢同買餸。
AIGTower夠環保
今年中區唯一甲級商廈新供應AIGTower，最近獲香港環保建築協會頒發「優秀」評級。喺香港環保建築協會五十九項評估標準中，大廈有四十八項達標。
呢幢大廈，前身係富麗華酒店，但發展商拆卸時，保留地庫土牆同樁帽，又大量採用預製樓梯同石膏板間隔系統，減少建築廢料。大廈採用具能源效益嘅外牆如遮陰設施，反射玻璃塗層系統等。大廈頂層又裝咗太陽能屏板，利用可再生能源嚟補充大廈嘅熱水供應。
電郵地址：[email protected]
