煲呔正式加入特首補選戰圈，果然來勢洶洶，一票都唔讓，睇怕達仔同金勞詹好快要投降。
煲呔真係好似孫悟空咁有分身術，一日走幾場都唔見佢攰，當然雙眼就有啲疲態啦，八方記得煲呔係一九四四年生，屬猴，唔怪得咁生猛，有設計師笑煲呔參選嘅標誌成個馬騮樣、好膚淺，殊不知煲呔猴年出生，個logo就係畫緊佢，都算好合適啫。當然設計嘅嘢好主觀，各花入各眼，煲呔自己鍾意咪得囉。
八方知道有班八卦之人，不但為煲呔問前程，重攞埋佢同許仕仁嘅生肖時辰去問高人，睇吓佢兩個夾唔夾，費事日後多事，結果梗係掂啦！許老爺四八年生，屬鼠，猴同虎相沖，同鼠就話冇問題喎。
挺曾之聲此起彼落
由煲呔宣布參選當日起，一時間全城挺曾之聲此起彼落，好話唔好聽，社會上稍為有頭有面嘅，呢幾日點都爭取機會响傳媒面前，講番兩嘴支持，以示緊跟中央，噚日表態嘅包括有新任恒生銀行總裁柯清輝同埋湖南省常務副省長于幼軍。
柯總話，煲呔係一個好適合嘅人選，除咗因為佢熟悉政府運作，最重要係佢民望高！柯總話對煲呔有期望，但要同煲呔當面講。大致上，都係希望佢能夠保持香港𠵱家啲優勢、維持良好營商環境之類。有人又問佢會畀幾多分煲呔個參選政綱，佢話未睇過，再者，「分數」呢家嘢係見仁見智。
湖南省省委副書記兼常務副省長、前深圳市市長于幼軍噚日喺香港大讚曾蔭權，話煲呔之前同廣東省深圳有好多聯繫，促進咗香港、深圳同廣東省嘅交流合作，希望佢會繼續推動廣深同泛珠三角嘅經濟金融合作。于幼軍又話樂見其成，重會積極響應，繼續保持同曾嘅個人感情同友誼，日後希望湖南同香港之間有更多積極交流。至於對李永達同詹培忠其他兩個候選人點睇，于幼軍就話唔了解佢哋兩個，無話可說喎。
傳真︰2623-9278
電郵︰[email protected]