張栢芝昨日帶同一隻迷你松鼠狗DomDom到商台接受訪問，並透露家中飼養了十八隻狗、四隻貓、八隻非洲龜、五條蜥蜴及一隻鸚鵡，而這位「動物癡」近日還從美國訂購了兩隻芝娃娃，她接受訪問時亦禁不住自喻家中是「迷你版米高積遜動物園」。
張栢芝昨日帶了一隻寵物松鼠狗DomDom到電台接受訪問，更笑言小狗姓Con，故全文就是Condom（安全套），栢芝說：「因為我呢隻狗一落地就會𠱁𠱁轉，所以就叫佢做DomDom啦。」栢芝的小狗更是一隻「富貴狗」，牠除了頸上繫了一條LV皮帶之外，就連所用的狗袋都是Gucci，栢芝透露家中更有一個狗衣櫃，內面全是Gucci及LV的用品。
繼續增產
訂購美國種芝娃娃
栢芝說：「之前我生日時叫朋友唔好送嘢畀我，如果佢哋要送，就送畀我啲仔女（指家中的寵物），所以佢哋都可以算係富貴狗，因為佢哋有Gucci嘅兜、床啦，亦都有LV嘅皮帶等等。」
「動物癡」栢芝更透露其家儼如一個「迷你版米高積遜動物園」，她說：「我𠵱家養咗十八隻狗、四隻貓、八隻非洲龜、五條蜥蜴同埋一隻鸚鵡，而我其中一隻金毛尋回犬就快生BB，同埋我又訂咗兩隻美國種嘅芝娃娃，不過要遲啲先有得攞。」栢芝透露之前還花了四萬八千元購買一隻老虎狗，她亦覺得老虎狗的身價甚高，將會為牠取名Daytona。
問栢芝哪有時間照顧眾多寵物時，她表示只負責幫小狗洗澡，而家中四個工人中，有三名是專門打理寵物的。再問栢芝一個月花多少使費在寵物身上？她說：「我諗係啲大狗去寵物店沖涼比較多錢，平時我都係畀白飯加雞肉佢哋食，咁就唔會買啲好貴嘅狗糧，同埋要去菜欄訂一箱箱蔬菜畀八隻龜食。」栢芝的舊愛謝霆鋒亦出名喜愛蜥蜴及龜，未知她是否受到對方影響而愛上這兩種動物？
栢芝昨日更謂會考慮訂購一隻松鼠狗吹氣公仔給DomDom「發洩」，她笑道：「DomDom佢好鍾意搞我啲公仔㗎，佢最長紀錄係喺個公仔上面搞咗四個鐘，fans送畀我啲公仔都係畀晒佢玩㗎。」
而創意無限的栢芝亦為家中即將生ＢＢ的金毛尋回犬起了一個十分貼切的名字，她說：「由於我呢隻領養番嚟嘅金毛係全屋唯一一隻狗女，而且佢已經生過兩次，所以乳房有下垂嘅情況，咁我就改咗佢個名做『墮lin娜』啦。我暫時都未知『墮lin娜』個肚係邊個經手，因為我都唔知咁多隻狗邊個搞過佢。」
尋找新寵
望養純粉紅色豬仔
一向十分喜愛小朋友的栢芝坦言十分渴望生小孩子，但目前為止仍未能達成願望，故希望家中的寵物都能生兒育女。自言四歲起已開始養狗的栢芝，更透露到現時為止她所飼養過的狗隻數目超過八十隻，現時希望購買一隻純粉紅色的小豬當寵物，她說：「我真係好想搵到一隻冇雜色嘅豬仔，但係我知道好難先搵到。」
採訪、攝影：李珮洳
