佘詩曼日前拍攝《火舞黃沙》一場孭仔戲時，因觸及腰部舊患，一時失去平衡雙膝跪地，個嘴撞落地面要入醫院，之後請假休息咗幾日，有人重話佢撞崩牙。
噚日阿佘因去馬來西亞為纖體公司做宣傳，終於出嚟見人，馮仁昭入咗機場搵佢，只見阿佘精神唔錯，唇紅齒白，佢重話好彩棚靚牙冇事㖭。
至於俾陳浩民叫佢做崩牙佘，佢就大發嬌嗔話：「我都冇聽過，佢就崩牙。」對有雜誌影到陳浩民送燕窩去探佢，阿佘就話：「多謝佢關心。」
提到前日陳浩民飲醉酒出席宣傳，阿佘就話：「我未睇報紙，咁小事，唔使打去問佢囉，佢好少飲酒，好易醉㗎。」問阿佘會唔會勸陳浩民唔好酒後開工，佢話：「都唔知係咪真，佢嘅嘢我唔會管。」
自嘲井底之蛙
而陳浩民噚日接受商台節目電話訪問，佢就解釋：「其實因為我有兩年幾冇返公司拍電視劇，我之前嗰晚去卡拉ＯＫ飲酒慶祝《施公奇案》煞科，唔係飲咗好多，第二朝重有酒味都冇辦法，可能因為太開心，所以佢哋睇到覺得我情緒高漲。而個反Ｖ粗口手勢其實我自己真係井底之蛙，我真係唔知嗰個係粗口手勢。」
江口洋介台灣秘密趕戲
日劇《白色巨塔》嘅男主角江口洋介，日前去咗台灣拍攝電影《鬼絲》，劇組前晚喺林口阿榮片廠趕戲，為咗保密電影公司就派工作人員喺廠外留守，嚴禁採訪。
而同片嘅台灣演員張震同陳柏霖都會喺片中講日文對白，陳柏霖重乘機搵江口做日文練習對象呢。
張佩金怕歷史重演
早前喺內地發生車禍嘅張佩金，前晚返咗香港，佢噚日到新城接受薛家燕訪問，家燕姐重畀咗封利是佢。自從發生車禍後，張佩金話𠵱家好怕單獨一個人，佢話：「車禍之後，我對的士有恐懼症，有一次重差啲歷史重演，個司機揸車時竟然瞓着咗。」
Rain遭侵權擬告官
韓國人氣偶像Rain嘅經理人公司，最近發現香港推出咗好多未經授權出版嘅寫真集，入面唔止撈埋《浪漫滿屋》嘅劇照，重出現其他韓星嘅相片，咁樣即係侵害Rain嘅肖像權，佢哋話呢啲寫真竟然可以喺隨街書檔同便利店出售，係非常荒謬同令人憤怒嘅事，所以揚言要對出版商採取法律行動。
陳苑淇行騷險出醜
陳苑淇（Jolie）噚日同LisaS.、Rosemary喺會展為婚紗展行catwalk，因為Jolie好緊張，佢喺台上唔小心踩到Rosemary裙尾，搞到Rosemary失平衡之餘，自己又差啲跣低，好彩有驚無險。Jolie事後話初時以為踩到自己條裙，原來係踩到人哋，覺得鬼咁唔好意思，佢話自己經驗淺，好彩有Rosemary同LisaS.教路。
