五月二十二日本欄講《數碼通用字通唔通》，談及「Wewin」嘅廣告口號。一位讀者Fred來電郵話「廣告口號要豪，MU（曼聯）自認為無敵之師，過去贏、現在贏，未來都會贏，自然應該用simplepresenttense，Wewin用得對。」
另一位讀者Jason來英文電郵話：Wewin不指任何特定事件，意思係Wealwayswin，就係廣告嘅訊息。但係當晚（五月二十二日）曼聯就輸咗足總盃，有啲諷刺。
Fred與Jason講得算有道理，左丁山唔敢話唔啱，但若以為用曼聯球員做廣告，講Wewin，咁就不幸揀錯時間、揀錯球隊咯。雖然Vodafone係曼聯球衣贊助商，有權使用曼聯球員為廣告背景啫。曼聯連續兩季四大皆空，球員表現不似有冠軍相，正是過去贏，現在輸，將來難講，點有資格講Wewin呢？講一次Wewon，都有相當困難啦。Nike一年用好多錢贊助曼聯，據報道話因為不滿意曼聯呢兩季成績，已經表示不滿。咁又係，Nike只想與贏家結盟，唔想與輸家扯上關係，如果曼聯下季再次四大皆空，贊助商點會唔詐型？
如果要落注，左丁山膽粗粗落注喺車路士，呢隊下季好有資格講Wewin，唔係講Wewon。曼聯喎，陣容不整，後防方面，門將不穩，右衞加利走下坡，中堅施維斯達信唔過，中場隊長堅尼已老，史高斯與傑斯失去銳氣，前鋒朗尼、雲尼斯達來雖好，但冇人餵波供應。費格遜領隊老氣橫秋，戰術運用方面輸晒畀摩連奴。總之全隊要大調整，慘在俾美國佬做咗一個LeveragedBuyOut，以後負上重債，唔夠資源收購當打兼好用嘅球員，可能會衰多幾年，曼聯擁躉要有心理準備至好，數碼通賣廣告，用曼聯球員講Wewin，實在不合時宜。