老懷安慰，一般情況係形容阿爸阿媽含辛茹苦養大個化骨龍，見到仔仔女女事業有成聽教聽話時的心情。原來，見到自己隻狗狗上電視表演跳呼拉圈、坐定定又扮死等高難度雜技，繼而成為狗壇明星曝光率爆燈，米飯班主一樣感動到眼濕濕。掌聲鼓勵––有請史納莎狗女winwin，重有三年來眠乾睡濕兼且威迫利誘winwin玩雜技踏上演藝之路的主人吳日言。
文：王長夏
攝影：黃子偉
鳴謝：PETogether（23011772）
請你愛我
芳齡三歲的史納莎女星winwin，因為米飯班主吳日言（阿Yan）身為娛圈中人，所謂嫁雞隨雞、嫁狗隨狗，惟有跟住主人通處走。早前，winwin跟隨主人上電視《有招出招》露兩手，只係隨便跳吓呼拉圈遞吓手，已經贏盡觀眾掌聲，更帶挈主人贏取一萬三千蚊獎金獎品，難怪吳日言錫到winwin燶。
幸福非必然，winwin細個亦做過幾個月難民。話說三年前吳日言失驚無神抱來一隻手掌咁大的史納莎狗女返屋企，重同吳爸爸、吳媽媽解畫呢隻豆釘只係朋友暫時寄養。後尾阿Yan先斬後奏買狗狗事件被揭發，正當winwin女腳震震等遣返，好彩佢冧人功夫了得，𠱁得吳爸爸首肯換取吳家永久性居民身份證，總算執番身彩。
親如姊妹
對於winwin，吳日言不只當作寵物看待，簡直當winwin是自己的妹妹般照顧，「其實我自小已經好想養狗，因為我冇兄弟姊妹，冇人陪我玩。」談到winwin的烏龍事，阿Yan即時笑不攏嘴：「每次有人返屋企，winwin都會好興奮咁跳上嚟，試過有一次，winwin又係咁跳跳扎，點知一跣腳，成隻狗凌空360o轉體撻咗落地，當時我心都痛埋，好彩見佢冇乜事，重識行過嚟嗲你，要你錫番！
「又試過有朝早，我瞓醒覺見唔到winwin，摷勻成間屋企都搵唔到佢，唔知佢匿埋咗去邊！後尾至知，原來佢一早已經爬入個去街袋度，等你帶佢出街。」
搵食艱難
一心諗住過少奶奶生活，食飽瞓瞓飽食兼俾人錫到燶的winwin，亦唔係飯來張口等人養咁他條。阿Yan設計了系列特訓畀佢：「所有訓練winwin的方法，都係我自己領悟出嚟，每次教佢做一種動作，需要不斷重複同練習，只要願意付出心機時間，任何事都能辦到。我問過訓練開狗仔嘅朋友，佢哋話狗仔長期喺屋企，訓練對佢哋嚟講好似份工咁，唔會殘忍。」
要數winwin的看家本領，首推在電視節目《有招出招》露過兩手的跳呼拉圈絕技，阿Yan憶述初時訓練winwin，全家人身體力行，個個輪住扮狗仔捐呼拉圈，而winwin就坐定定偷師，似乎係阿Yan成家娛樂winwin呢位皇帝女多啲噃！
絕招連環嗲
除了接受艱苦訓練，winwin自小已經家教甚嚴，在家完全不敢造次，全靠阿Yan教導有方。「狗狗同人唔一樣，假如佢做錯事之後用重語氣鬧佢，或輕輕用手打佢patpat，佢就會知道自己做錯。下次如果佢再想做錯事，就會諗起被主人打『慘況』。」精甩尾的winwin其實一早看穿主人底牌，每次做錯事就快俾人鬧，winwin都會即時撲上阿Yan心口，使出絕招連環嗲，阿Yan還笑言winwin這招成功率甚高。
好狗騷
絕招二
GivemeFive
