早前NDS《任天狗》大熱，唔少人因為咁入貨成為咗NDS機主，不過玩咗一段日子，或者大家都開始有啲悶，而且淨係用嚟撚狗，似乎浪費咗設計得咁獨特嘅主機，最近記者發現唔少早前賣約$300嘅遊戲，都跌到$90至$200鬆啲，呢個非入貨不可嘅價錢！所謂Game唔怕舊，只要好玩就所有Game迷都受，趁住有平Game，各位NDS機主快啲入貨啦！
記者：梁瑋瑜 攝影：楊錦文
Models：Jason、Peggy（Starryland）
資深機主狂冧Game推介
NDS初出時，適值日圓高企，再加少少炒味，連帶好多日版Game都要賣成$300或開外，不過隨後美版遊戲嘅殺入，開價$230左右已經甚具吸引力，加上英文點都易明過日文，好自然Game迷都馬上「棄日投美」！
水貨商為求自保，𠵱家好多日版遊戲推出日期都已非常貼近，加上「舊Game必減」呢個定律，個價就更靚！以下5位NDS資深機主，全部都係半年前第一手上會嘅機主，佢哋各人推介自認為最好玩嘅NDS筍Game，更重要當然係價格大滑落啦！
刺激人士必玩
《Touch！卡比》可愛到殺死人
玩乜嘢：有打開機都對《星之卡比》好熟悉㗎喇！《Touch卡比》呢個遊戲都係靠玩家用筆帶佢過關，不過今次唔單止幫佢畫路線，重可以點擊卡比令佢加速，又或者點擊敵人等卡比行埋去碌死佢，都幾殘忍吓！
另一個特別玩法，就係當出現擁有特殊能力嘅敵人時，只要卡比打敗佢就可以複製呢個敵人嘅能力，變成光球或者石頭，適應唔同關嘅需要，遊戲係屬於比較傳統嘅過關遊戲，裏面亦有稱為SubGame嘅小遊戲，玩過關玩得緊張，又可以輕鬆吓！
機迷阿偉
《Touch！卡比》最正嘅地方係好有速度感，玩嘅時候感覺好爽快，開頭嘅時候都覺得幾易玩，但玩到5、6關左右開始難，要反應快之餘又要用吓腦，好有挑戰性！
女生必玩
《Catch!Touch!Yoshi!》Sell卡娃依
玩乜嘢：《瑪利奧》一向係任天堂王牌，今次化身為瑪利奧BB加上Yoshi小龍，好多女機主出機必買！遊戲共分5個目標模式，攞到愈多金幣，就可以得到一隻愈勁嘅Yoshi嚟接你，而玩家就要用筆畫出一嚿嚿雲畀佢哋行過，當然要小心中途遇到嘅敵人，大家不妨用筆圈住佢，等佢化成金幣，畫錯咗只要對住個咪一吹，就煙消雲散㗎喇！
機迷阿欣
畫面好得意可愛，玩法全憑直覺，簡單又好玩！而且遊戲只係挑戰自己記錄，就算玩得唔係好叻，只要破到自己記錄都已經好開心！
瑪利奧Fans必買
《瑪利奧DS》3D能力強！
玩乜嘢：任天堂出品當然唔少得自家主角瑪利奧，雖然俾人批評同GameCube嘅《瑪利奧64》一樣，不過長青嘅冒險遊戲自然有一定嘅吸引力，而且遊戲的確好玩，起初用Yoshi嚟玩，之後執到瑪利奧帽就可以變身用瑪利奧玩，下畫面顯示全區地圖，玩家要打敗大佬，取得版圖內嘅星星，就可以過關，遊戲以3D立體製作，畫面唔錯，不過要打爆機唔係咁容易。
機迷趙先生
由紅白機年代已經開始玩瑪利奧，梗係有親切感啦，而且最正嘅係3D畫面，比起其他NDS遊戲畫面出色好多呀，個遊戲要成日轉嚟轉去，少啲方向感都唔得，好好玩！
傳統玩家必玩
《食鬼》畫得快食得快
玩乜嘢：家傳戶曉嘅《食鬼》遊戲，喺NDS上面都可以一改傳統嘅形象，變成一個極有創意嘅遊戲。首先玩家要學識點畫一隻食鬼，畫好嘅佢就會口擘擘走去食怪獸，玩家重可以畫條線去改變食鬼行走嘅方向，不過如果隻食鬼走出咗畫面，你就同佢後會無期，要畫過另一隻㗎喇！只要喺指定時間裏面食晒所有怪獸就可以過關，之後重要畫埋箭嘴同埋炸彈幫你過關。
機迷Margaret
估唔到咁老土嘅食鬼都有咁得意嘅玩法，因為每關都要喺指定時間內完成，所以好緊張，而且畫得唔核突啲都唔得，真係又考畫工又考反應。
RPG迷必買
《EggMonsterHero》搞笑半熟英雄
玩乜嘢：NDS上面少見嘅RPG，取材自《半熟英雄》系列，人物夠晒得意生鬼，最特別嘅係作戰嘅時候玩家需要用到下面嘅TouchScreen同敵人進行ScratchBattle，當遇到敵軍嘅時候就要用支筆嚟將自己軍隊不停咁拉向敵軍，重可以召喚埋「雞蛋獸」出嚟幫手作戰，更可以用無線通訊同埋其他玩家一齊玩㖭！
機迷阿偉
一向都鍾意玩RPG㗎嘞！用NDS嚟玩雖然畫面唔算好靚，不過真係幾搞笑，同埋作戰方法夠晒特別，係其他主機冇辦法可以比得上嘅！
NDS走寶正Game
其實市面上唔少NDS遊戲，都因為冇乜宣傳而被人遺忘，呢啲遊戲一樣好有特色，而且價錢重好平，「筆直」唔高嘅都可以考慮吓。
全城最平
Cool104Joker&Setline
可能係NDS最平嘅Game，啱晒一啲鍾意用腦嘅朋友，《Cool104Joker&Setline》係一個啤牌遊戲，玩家要喺五張開咗嘅牌入面，拎出同上一張相同花或者數字嘅牌，只要成功抽出一定數目就可以過關，而Setline裏面有一個六角形嘅盤，將相同顏色聯起嚟就可以得分，$90有兩個Game，真係好抵玩。
死老竇之謎AnotherCode
《AnotherCode》係一個解謎遊戲，故事女主角3歲時雙親被人刺殺，之後佢就成日發夢見到當晚嘅情景，於是決定去尋找父母死亡嘅原因，呢個遊戲充分利用兩個螢幕，下面用嚟行動，上面就顯示故事內容，不過暫時只有日版，唔識日文嘅朋友可能有少少難度。
擲物狂熱GuruGuru投出吧！
故事主角史多羅係魔法學校嘅學生，為咗成為最優秀嘅學生，佢要練成一個投球魔法，玩家利用下面嘅TouchScreen就可以幫主角練習投球，原理好似擲鐵餅咁，先喺原地轉，適當嘅時候就用力扔出去，非常之有趣！
Sales教路放Game攻略
先達TTCindy：見平就好買！
冧價Game固然值得入！其實大家手上好多「玩爆」咗嘅NDS遊戲，亦可以幫你套現「幫保」買新Game！以下呢3隻都係現時好價「二手放Game」，要放就快手，過多個星期價格有郁動就喊都無謂！
快放咪跌錢Nintendogs
全新大約$280，𠵱家放到$200-220左右，當然唔係咩好價錢，不過最近愈嚟愈多人放《任天狗》，如果你狠心拋棄愛犬的話，𠵱家唔放，恐怕過多個月連$200都冇。
好價「高」放！Meteos
因為口碑奇佳，唔好話二手，連一手都經常缺貨，推出嘅時候只係$290左右，而且放二手的話高至$240都大把人爭住買，如果你有喺手，又已經唔玩，而家放係好時機！
蝕$50離場Bomberman
街價三百多啲，二手可以高達$260，賣出去都只係蝕$50左右，都係因為唔係度度都有得賣，而且二手貨源唔多，有得吊高嚟賣。
店舖資料
（a）TTGame 地址：旺角先達廣場1樓F83、86舖
電話：23916719
（b）高田 地址：旺角先達廣場1樓F98舖
電話：23943200