現年二十歲、模特兒出身嘅日本女星山田優，俾噚日出版嘅日本雜誌《Friday》偷拍到同靚仔男星伊藤英明約會嘅相片，呢單新聞一曝光，優妹噚日即透過事務所向日本傳媒宣布已經同伊藤分手，真係唔知真定假！
據新一期日本雜誌《Friday》報道，二十九歲嘅伊藤英明上月初某夜被偷拍到坐住由經理人揸嘅車，去山田優屋企樓下接載女方去shopping，之後重一齊返去伊藤屋企㖭。
男友家溫馨
優妹喺三日後又被發現去咗伊藤屋企，再過多兩日，佢又喺伊藤屋企出現，似乎兩位大忙人都好識得利用公餘時間，一唔使開工就返屋企約會。事實上，佢哋三個月前已經傳出緋聞，而且俾人見過約會幾次。
不過唔知係咪怕拍拖影響人氣，山田優噚日竟然急急腳搵事務所幫佢發傳真畀日本各大傳媒，話經過考慮後，決定同伊藤英明分手，而日本傳媒覺得優妹今次咁樣發表「分手宣言」簡直係前所未有。
伊藤多緋聞
查實伊藤英明近年都幾多緋聞，四年前傳過佢同女星水野美紀拍拖，上年二月又俾狗仔隊偷拍到佢同富士電視台女主播中野美奈子一齊，真係豔福不淺呀！