迪比亞路親民冧fans
祖記「金童」迪比亞路雖然喺隊中重要性今非昔比，不過論親民程度就贏晒，無論喺機場同酒店，「細路」都主動幫球迷簽名，而且重有求必應個隻，大大話話簽成二、三十個簽名，冧盡祖記fans啦。
內地球迷聲勢唔嘢小
祖記嘅魅力唔只吸引香港球迷，連國內嘅球迷都千里迢迢嚟香港捧場；好似中國尤文圖斯（祖雲達斯）長城球迷會會長任先生，就由北京來港捧場，佢重話今日有多二、三十人由內地來港入場觀戰，睇吓到時係香港球迷，定係國內球迷聲勢勁啲呢？
冇記者問杜林場面尷尬
祖記四大球星迪比亞路、尼維特、查斯古特及杜林，同埋教練卡比路出席記者會，由於時間緊迫，傳媒只可以向每個球星問一條問題；不過輪到杜林時，就冇傳媒問佢嘢，話晒杜林都係世界一級鐵衞，搞到場面有啲尷尬。
「細路」練波被省中要害
雖然只係表演賽，祖記抵埗後立即進行嘅操練都好認真，尼維特喺練傳球時重唔覺意省中迪比亞路「要害」，搞到迪比亞路當場瞓低，好彩經過軍醫治療後冇乜大礙，祖記fans總算鬆一口氣。
4千球迷觀操滿載而歸
噚日就有超過四千球迷入場參觀祖記喺大球場嘅操練，雖然落起毛毛雨，不過都冇影響班fans嘅熱情，最後佢哋嘅熱情都得到回報；迪比亞路、尼維特及教頭卡比路，收操後都同fans簽名，fans總算滿載而歸。
夜探蘭桂坊摸杯底
尼維特同杜林等七八位祖記球星嚟到香港，自然要見識吓香港嘅不夜天，而噚晚食完飯，大約十點左右經記者帶路分乘兩架的士去中環蘭桂坊飲番杯，佢哋到埗後，就搵咗間露天酒吧坐低，摸吓杯底、傾吓偈，重有市民想搵佢哋簽名同合照。
