周麗淇日前接受訪問時論盡螢幕男友陳豪和緋聞男友陳冠希（Edison）。她笑稱陳豪蠱惑兼深藏不露，爆笑效果令她冧到震。至於被形容為𠝹女王的Edison，周麗淇雖大讚對方靚仔，但就不敢跟他拍拖。
周麗淇在無綫劇集《秀才遇著兵》中與陳豪組情侶檔上陣，日前她在銅鑼灣接受訪問時，揚言首次跟對方合作已擦出火花，周麗淇說：「以前以為佢唔出聲，合埋把口好似好斯文，原來佢好鬼死蠱惑，深藏不露呀。佢拍戲會突然爆肚，自己成日講啲低能嘢喺度笑，冇喇喇講嘢高音又走音，跟住又喺度笑喎，真係臉皮厚，好鬼曳㗎。不過佢幾好玩，又搞笑。」
讚Edison夠真
陳豪能冧到周麗淇這樣開心，問周麗淇會否跟對方擦出愛火花？她說：「冇，我唔啱㗎。喺好多人心目中，佢係理想男朋友，喺我心目中就冇嗰種感覺，唔係好啱我，冇乜feel呀，佢似阿哥多啲。」
周麗淇雖直言對陳豪冇feel，但她與陳冠希的緋聞卻一度傳得極盛，就算現在，她亦不避嫌視對方為好友，更替他講盡好話，她說：「佢幾慘㗎，佢唔係報道中所講成日𠝹女，Edison喺外國長大，幾我行我素，個人幾真，對朋友亦都幾真，咁啱同女仔食飯就俾人寫，同男仔食飯又話搞基，但佢幾叻仔，乜都唔理，佢又唔會為呢啲新聞唔開心，我幾佩服佢呢樣。」
既然周麗淇勁讚Edison，那跟對方有否發展機會？她笑說：「佢太靚仔，幾冇安全感㗎。講笑啫，朋友發展就得。」
戀情無疾而終
周麗淇又透露早前曾有段戀情萌芽，但短時間內已無疾而終，她說：「大約七、八個月前都有同一個圈外嘅男仔約吓睇戲，但好似做賊咁，一個行前一個行後，冇得發展啦。自己事業啱啱起步，不如算啦，人有時要食得鹹魚抵得渴，等所有嘢穩定啲，做多幾年至講啦。」
採訪：朱倬誼 攝影：陳偉權
服裝：SistyrMoon
場地：HomishInterior&FurnitureDesign
