Tattoo星星圖案上位男爆手腳女紋心口

Tattoo星星圖案上位男爆手腳女紋心口

大概是近幾年明星、NBA球星等推波助瀾,如今男仔紋身不再被稱為「公仔佬」,女仔亦不再被視為死飛女,反而變成潮人的標誌。夏天殺到,大家除咗努力KeepFit咇走腰間贅肉外,亦要留意今期興玩乜圖案,好等去沙灘晒靚紋身。究竟呢期至潮圖案係乜?據星級紋身師Gabe透露,星形圖案今夏必爆!

記者:招佩珊
攝影:梁細權、周旭文

星級紋身師Gabe

是美國有名紋身組織SuperiorTattooClub的終身會員,當了十多年TattooArtist,曾替不少明星如張栢芝、何超儀、盧巧音等紋身。

熱爆圖案 第1位 星星

星星圖案之中,特別以空心五角同立體五角星最多人揀,亦夠襟睇,亦是代表Lucky的幸運星。

■全身星星Penny:上年年中紋第一粒,覺得靚囉,愈紋愈多,有廿幾粒星。

■Zoe:靚囉,畀自己一個紀念,「Z」就係我個名。

■豪仔:紋第一個後上咗癮,今次索性紋個大嘅。

■鼓手Kelvin:爆手圖案夾夾埋埋紋咗好多次,手踭位啲星星係最近新紋嘅。

圖案講求立體感

紋身就好似Fashion,圖案亦講潮流,三、四年前就興Tribal民族圖騰,近一、兩年勁Hit彩色圖案,而且圖案講求細緻同立體感,至於今年又興乜?紋身師Gabe話:「爆手腳(紋滿前臂或小腿)喺美國興咗好耐,兩、三年前香港已經接受,尤其是男仔,好多都鍾意爆手爆腳的大型圖案,而且第一次紋就已經要爆;女仔就興紋小型圖案,但無論係大定細,今期至Hit一定係彩色。」
今季男生繼續「爆」,女生的紋身就有新「落點」,以往通常紋在頸後、褲頭位、小腿側或背部近肩膀,近排就多了女仔紋在心口正中,洛文說:「見其他人紋來紋去都係背脊同腳眼,紋喺心口正中夠特別,戴埋頸鏈就好似帶咗鏈墜咁。」身上紋了二十多粒星的Penny,同樣於上月紋了粒星於心口正中位;的確,尤其是夏天女生穿起小背心,心口Show紋身若隱若現,夠特別又性感。

■女生另一必紋位:背後近Bra帶位置,着Bikini時有睇頭。

夏天流行海洋生物

據Gabe所講,香港的紋身圖案潮流,統統都跟隨美國同日本個Trend,「紋身喺美國同日本好Hit,好多專門介紹紋身圖案的書,我都會用來作參考,近期就發現多了好多羽毛同櫻花圖案,呢排又突然間多了人揀,以前紋呢兩款圖案的人唔多,今季特別Hit。」另外,原來紋身圖案都有季節性,據Gabe透露這個多月揀海洋生物如鯊魚、海豚、鸚鵡螺等圖案的人亦忽然間多起來,「夏天多人玩Wakeboard同潛水,所以想揀同海有關的圖案。」

■海洋生物圖案果然Hit,Gabe正為另一位客人構思鯊魚圖案。

■本地紋身友,亦會參考美國同日本紋身書。

其他熱爆Tattoo圖案

第2位 皇冠

有黑色同彩色兩款,細細個的彩色皇冠女生最Buy。

■洛文:最緊要襯自己,蝴蝶太女性化唔啱我。

第3位 羽毛

手工精細,予人輕飄飄的感覺,難怪女生一見鍾情。

■Ann:羽毛輕飄飄,睇到佢感覺都好似輕咗。

第4位 水族生物

日本紋身書專題介紹水族生物紋身圖案,有書力撐又啱夏天,唔Hit就奇。

第5位 櫻花

喺日本勁Hit,本地紋身潮流多參考日本紋身書,呢股櫻花熱亦吹到香港。

另類位置:圖騰紋腳面

今年圖騰紋身又再流行,但位置就由身上轉移到腳面。事關潮人今季興着人字拖露兩腳,Show埋紋身更型格!

■着咗人字拖?

■印度Henna紋身

地址:龍威雕師(27231566)
尖沙嘴金馬倫道8號4樓
永久紋身收費:小型圖案$300-$1,200(視乎顏色、複雜度及圖案數量);大型圖案則面議;須預約。