NBA進入最後直路，真係場場激戰，好多冇裝寬頻嘅「現在台」球迷，都好多謝「絲帶台」免費睇NBA，不過「絲帶台」播緊戲肉嘅時候亂咁刪剪，就令球迷氣結同失望嘞！
太陽窮追竟播廣告
好似「絲帶台」噚日朝轉播太陽對馬刺嘅西岸決賽一役，場波九點鐘開波，「絲帶台」就十點九開始錄播，我求大俠晨早起身，特登唔上網查戰果，坐定定睇「絲帶台」，當正直播咁睇；當打到第四節最後兩分幾鐘，一度落後十三分嘅太陽，憑A史杜達米亞爆籃追剩四分，球迷都好緊張太陽可唔可以反敗為勝之際，點知「絲帶台」賣完廣告返嚟，竟然剪剩最後四十秒，當時馬刺又拉番開七分，到底太陽為咩唔可以反先就冇人知，睇咗成朝竟然冇得睇最關鍵嗰段，球迷唔嬲就假。
聽聞「絲帶台」將會直播NBA總決賽全部賽事（未公布作實），希望佢哋到時提供「原汁原味」嘅球賽，將功補過，如果唔係就真係趕客嘞。
唔心急買基拿甸奴
AC睇定先趁火打劫
今個意甲聯球季完結後，球迷最關注係帕爾馬件搶手貨基拿甸奴花落誰家。AC米蘭會長加里安尼日前就話暫時唔會出手，費事影響到人哋備戰護級附加賽喎。計我話AC方面想睇住嚟食，假如帕爾馬最後護級失敗急住沽貨，「基奴」個價就一定驟降，到時可以執平嘢囉。
又入2粒自由球
聖保羅門將變射手
南美球隊往往卧虎藏龍，噚晚聖保羅四比○大勝堤格雷斯場南美自由盃，門將辛尼入咗兩球自由球，如果唔係有球十二碼射失咗，已經追平咗巴拉圭門將捷拉華一場入三球嘅紀錄。另外，呢個聖保羅門將今屆自由盃已經入咗四球，成為球隊頭號射手，認真唔簡單。
捧盃有功獲續約4年
查奧尼狗熊變英雄
利物浦嘅法國後衞查奧尼喺四個月前對般尼場英足總盃，入咗個極之搞笑嘅烏龍波令球隊出局，事後俾人插到飛起，其中紅軍球迷重作咗首歌嚟潤佢。但佢喺歐冠盃決賽對AC米蘭救空門，幫紅軍攞咗二十一年嚟首個歐冠盃冠軍後，即刻重獲續約四年，由狗熊變英雄。