美股掂，但港股好友竹籃打水一場空。開市4分鐘，恒指升73點，埋單計反跌58點。中移動（941）見過29.10元（升0.35元）後，回落低收28.40元，跌0.35元，拖低恒指22點，結束連升4日嘅場面。同5日前比較，中移動仍升1.70元，對恒指升幅嘅貢獻，仍達107點。
中移動回頭，揸恒指P輪有運行，昨日推介嘅3943繼續諗得過。
中移動C輪3644：中移動下跌，中移動C輪下跌本屬應該，但龍虎榜上排頭位嘅竟然係隻中移動C輪，號碼3644，前日19仙，昨日28仙，升幅47%，唔算乾炒，有7球易手，銀碼兩球。要搵原因，大概係因為過去兩三個禮拜正股向上移動之時，隻輪冇跟住升，𠵱家1鋪補數。唔使恨，就算先一排發覺冇升而應該買入乘機搵米，都冇法子做到，原來昨日打上17日，1份都冇成交，而掛牌5個幾月，除咗頭幾日同埋昨日之外，得3日有成交，總共1.35球。街貨0.2%，冇乜人喺隻輪身上搵到真銀。
中移動P輪4938：中移動估計續有回吐，買P輪4938，11月夠鐘，輪價16.6仙，溢價6.6%，槓桿率17.1倍（有效7.4倍），引伸波幅24.2%。
章盛