徐子淇一向是Boots健康食品的代言人，廣告商近日找了型男吳彥祖與她合作，在泳池打水球拍廣告。子淇表示以前獨自拍廣告很悶，現在夥拍吳彥祖會更熱鬧，二人以廣東話夾雜英語溝通，啱晒channel。
徐子淇是Boots健康食品Detox5-DayPLan的代言人，廣告商最近為她找了一位型男拍檔吳彥祖，二人穿上泳裝在泳池打水球，活力迫人。
自嘲海獅頂波
穿上泳衣的子淇和只穿泳褲的吳彥祖，一齊在泳池打水球，二人平時都很喜歡運動，故拍攝時份外投入，她笑說：「我覺得自己好似海洋公園嘅海獅，喺鏡頭前表演『頂』波仔。」
子淇這次夥拍吳彥祖，可會覺得代言地位被分一杯羹？她說：「唔會，我重好歡迎佢㖭，因為以前一直都得我一個人拍廣告，感覺好悶，多咗吳彥祖一齊出鏡，我哋拍嘢時會熱鬧啲。」
問子淇可有跟吳彥祖交流一下護膚心得？她說：「有㗎！」子淇直言平時看男生都會留意對方的皮膚，她說：「如果對方皮膚乾淨，同埋手指甲冇綑黑邊，即係證明佢好注重衞生，始終呢啲係個人儀容。」
入行前已認識
此外，子淇回想七年前尚未涉足娛樂圈，便已認識吳彥祖，她說：「我記得當時佢都係啱啱嚟香港發展，佢同我都唔識講廣東話，所以我哋都係用英文傾偈。不過𠵱家我哋都入咗行發展，大家都迫住要學好講廣東話，所以我哋呢次合作拍廣告，已經可以轉channel用廣東話交談，但都會夾雜啲英文。」
採訪：比華利
